Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 95 Hüküm no: 58 Orijinal metin no: [7b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Varsama bt. Yani ile Yamandi, Damyano ve Koço’nun sulh oldukları Mahmiye-i İstanbul’da Kanlıkenîse kurbünde Kiremid mahallesinde sâkine ve şahsı Kostanti v. Dimitri ve Yanaki v. Dimitri nâm zimmîler ta‘rîfleriyle mu‘arrefe olan Varsamana bt. Yani nâm Nasrâniye meclis-i şer‘de kendi kıbelinden asıl ve zevcesi Marya bt. Damyano v. Yorgaki nâm Nasrâniye ile dâmâdı Koço v. Yani v. Mihal nâm zimmî taraflarından zikri âtî ibrâyı tasdîka sâbitü’l-vekâle vekîlleri olan işbu hâmilü’r-rakīm Yamandi v. Yorgi nâm zimmî muvâcehesinde ikrâr ve takrîr-i kelâm edip ben bundan akdem merkūm Yamandi ile müvekkilân-ı merkūmân bir menzilde ma‘an sâkin olmalarıyla sekiz sene merkūmûna hizmet etmiş idim deyü müddet-i mezbûrede lâzım gelen ücretimi mezbûrûndan taleb ve da‘vâ sadedinde olmuş idim el-hâletü hâzihî beynimize muslihûn tavassut edip da‘vâ-yı mezkûremden beni merkūmûn Yamandi ve Damyano ve Koço ile yirmi guruş üzerine inşâ-i akd-i sulh eylediklerinde ben dahi ber-vech-i muharrer sulh-i mezbûru kabûl ve bedel-i sulh olan meblağ-ı mezbûru merkūmûn Yamandi ve Damyano ve Koço yedlerinden tamâmen ahz u kabz eylediğimden sonra husûs-ı mezbûra müte‘allika âmme-i da‘vâdan merkūmûn Yamandi ve Damyano ve Koço’nun zimmetlerini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis min-Recebi’l-ferd li-sene 1137. Şuhûdü’l-hâl: İbrahim b. Muharrem, Halil b. Mustafa, Ali b. Ahmed, el-Hâc Mehmed b. Abdullah, İbrahim b. Mustafa, Mustafa b. Receb, Mustafa b. Ahmed, Mustafa b. Abdullah.