Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 96 Hüküm no: 59 Orijinal metin no: [7b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un kızı İstemihan bt. Mehmed’e sattığı eşyaların parasını tahsil ettiği Mahrûse-i Galata hâricinde Bedreddin Bey mahallesinde sâkine ve zâtı Mustafa b. Mahmud ve İbrahim b. Mehmed nâm kimesne[ler] ta‘rîfleriyle mu‘arrefe olan Âişe bt. ( ) nâm hâtun meclis-i şer‘de sadriye kebîre kızı işbu bâ‘isetü’l-vesîka İstemihan bt. Mehmed nâm hâtun mahzarında ikrâr ve takrîr-i kelâm edip eşyâ-yı memlûkemden bir sagīr sîm kuşak ve iki minder ve bir döşek ve iki yorgan ve bir kebe ve bir köhne kaliçe ve iki köhne keçe ve bir tencere ve iki sahan ve bir leğen ve iki kahve ibriği ve bir hamâm tası ve bir kefkir ve bir kefce ve altı yasdık ve bir köhne hatâyî kaftan ma‘a anteri kızım mezbûre İstemihan Hâtun’a bi-safkatin vâhidetin bâtten yirmi guruşa bey‘ u teslîm eylediğimde ol dahi ber-vech-i muharrer ba‘de’l-iştirâ ve’t-tesellüm ve’l-kabûl semeni olan meblağ-ı mezbûr yirmi guruşa müte‘allika da‘vâdan mezbûre İstemihan Hâtun’un zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm eşyâ-yı muharrere-i mezbûre merkūme İstemihan Hâtun’un mâlı ve mülkü olup benim kat‘an alâka ve medhalim kalmamışdır dedikde gıbbe’t-tez[kiye] keyfemâ teşâ ve yahtâr mutasarrıfa olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâbi‘ min-Recebi’l-ferd li-sene 1137. Şuhûdü’l-hâl: Serrac el-Hâc Mustafa, Mehmed b. Abdullah, İbrahim b. Ali, Mustafa b. Mahmud, Mustafa b. Receb, Serbölük İbrahim b. Muharrem, Halil b. Mustafa.