Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 97 Hüküm no: 60 Orijinal metin no: [7b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dizdar Mescidi Vakfı’na Hasan Efendi’nin mütevelli tayin olunduğu Mahrûse-i Galata muzâfâtından kasaba-i Kasımpaşa’da el-Hâc Hüsrev mahallesinde vâki‘ merhûm Dizdâr nâm sâhibü’l-hayrın mescid-i şerîfi vakfına ber-vech-i hasbî mütevellî olan Musa Çelebi b. Hüseyin fevt olup tevliyet-i mezbûre mahlûle kalmağın hâlâ mescid-i mezbûrun imâmı ve tevliyet-i mezbûreye her vechile ehil olduğu mahalle-i mezbûre ahâlîsinden imâm Seyyid Yahya Efendi b. es-Seyyid Mustafa ve es-Seyyid Mustafa Çelebi b. Musa ve es-Seyyid Mehmed b. Ahmed ve el-Hâc Mustafa b. Abdullah ve Hasan Çelebi b. Receb ve Mehmed Ağa b. Musa ve Hüseyin Çelebi b. Ali ve Hasan Halife b. Abdullah ve el-Hâc Mehmed Efendi b. Hüseyin ve Hüseyin Çelebi b. Hüseyin nâm kimesneler ihbârlarıyla zâhir ve âşikâr olan işbu râfi‘u’l-vesîka Hasan Efendi b. el-Hâc Mehmed Efendi nâm kimesne savb-ı şer‘den tevliyet-i mezbûreye ber-vech-i hasbî mütevellî nasb ve ta‘yîn olundukda ol dahi ber-vech-i muharrer tevliyet-i mezbûreyi kabûl ve mahallinde hıdemât-ı lâzımesini ikāmete ta‘ahhüd etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’l-hâmis min-Recebi’l-ferd li-sene 1137. Şuhûdü’l-hâl: İbrahim b. Muharrem, Halil b. Mustafa, Mustafa b. Receb, İbrahim b. Mustafa, Mustafa b. Ahmed, Mehmed b. Ahmed, Ali b. Ahmed, Süleyman b. Ahmed.