Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 97 Hüküm no: 61 Orijinal metin no: [7b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saka Osman b. Abdullah’ın Emine bt. Abdullah’tan doğma çocuğu Ali için nafaka ödemeye mahkum edildiği Mahrûse-i Galata’da Câmi‘-i Kebîr mahallesinde sâkine zâtı ta‘rîf-i şer‘î ile mu‘arrefe olan işbu bâ‘isetü’l-vesîka Emine bt. Abdullah nâm hâtun meclis-i şer‘de takrîr-i kelâm edip işbu hâzır bi’l-meclis zevcim Saka Osman b. Abdullah bundan akdem beni tatlîk etmeğle mezbûrun firâşından hâsıl ve benden mütevellid işbu sagīr oğlu Ali’nin nafaka ve kisveye zarûret ve ihtiyâcı olmağın sagīr-i mezbûrun nafaka ve kisvesiʼçün babası mezbûr Osman üzerine kıbel-i şer‘den kadr-i ma‘rûf meblağ farz ve takdîr olunması matlûbumdur dedikde hâkim-i muvakkı‘-ı sadr-ı kitâb tûbâ-lehû ve hüsnü-meâb hazretleri dahi tarafeyn rızâlarıyla sagīr-i mezbûrun nafaka ve kisvesiʼçün babası mezbûr Osman üzerine târih-i kitâbdan külle yevmin ikişer para farz ve takdîr edip ve meblağ-ı mefrûz-ı mezkûru nafaka ve kisvesine harc ve sarfa ve lede’l-iktizâ istidâneye ve ınde’z-zafer babası mezbûr Osman üzerine rücû‘a mezbûre Emine Hâtun’a izin verilmeğin mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis min-Recebi’l-ferd li-sene 1137. Şuhûdü’l-hâl: İbrahim b. Mustafa, Alufteci Mehmed, Mehmed b. Ahmed, Muhzır Ali Bey, Ahmed Bey, Süleyman Bey.