Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 98 Hüküm no: 62 Orijinal metin no: [8a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salih Çelebi b. İbrahim’in menzillerini kardeşi Ali Çelebi b. İbrahim’e sattığı Mahrûse-i Galata muzâfâtından kasaba-i Fındıklı’da el-Hâc Receb mahallesinde sâkin Salih Çelebi b. İbrahim nâm kimesne meclis-i şer‘de li-ebeveyn er karındaşı işbu sâhibü’l-kitâb Ali Çelebi b. İbrahim nâm kimesne mahzarında ikrâr ve takrîr-i kelâm edip mahalle-i mezbûrede vâki‘ bir tarafdan el-Hâc Hasan Vakfı ve bir tarafdan ba‘zen Kolancı Hasan Reis mülkü ve ba‘zen Gül Hâtun Vakfı ve bir tarafdan Saka Yusuf mülkü ve bir tarafdan tarîk-i hâs ile mahdûd tabaka-i ulyâda üç bâb oda ve bir sofa ve vüstâda üç bâb oda ve bir sofa ve süflâda mahtab ve kenîfi müştemil mülk menzilin nısf-ı şâyi‘i benim ve nısf-ı şâyi‘-i âharı karındaşım mezbûr Ali’nin iştirâken mülkümüz olmağın menzil-i mahdûd-ı mezkûrda olan nısf hisse-i şâyi‘am ile menzil-i mezbûra muttasıl arsasının merhûm Hacı Hasan Vakfı’na mukāta‘a-i kadîmesi olup müstakıllen mülküm olan fevkānî bir matbah ve bir kilâr ve tahtânî kenîfi müştemil mülk menzilimi karındaşım mezbûr Ali Çelebi’ye tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile yüz seksen guruşa bey‘ u teslîm edip ol dahi ber-vech-i muharrer iştirâ ve tesellüm ve kabûl eyledikden sonra semeni olan meblağ-ı mezbûr yüz seksen guruşu karındaşım mezbûr Ali Çelebi’nin yedinden bi’t-tamâm ahz u kabz eyledim ve menzil-i mezbûra müte‘allika âmme-i da‘vâdan karındaşım mezbûr Ali Çelebi’nin zimmetini ibrâ ve ıskāt eyledim ba‘de’l-yevm menzil-i mahdûd-ı mezkûrun mecmû‘u karındaşım mezbûr Ali Çelebi’nin mülkü olup benim kat‘an alâka ve medhalim kalmamışdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâbi‘ min-Recebi’l-ferd li-sene 1137. Şuhûdü’l-hâl: İmâm Abdurrahman Efendi b. el-Hâc İbrahim, el-Hâc Osman b. Mehmed, Helvacı el-Hâc Süleyman, Mehmed Yazıcı b. el-Hâc Ahmed, Demirci Hasan Beşe, Manav Ahmed Çelebi, Hüseyin Yazıcı b. Mustafa, İbrahim b. Muharrem.