Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 98 Hüküm no: 63 Orijinal metin no: [8a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Ahmed’in menzil hissesini Emetullâh bt. Muslı’ya sattığı Mahrûse-i Galata’ya tâbi‘ kasaba-i Fındıklı’da Pürtelaş Hasan mahallesinde sâkine olup zâtı Osman Çelebi b. Hasan ve Ahmed Çelebi b. Nasuh nâm kimesneler ta‘rîfleriyle mu‘arrefe olan Fâtıma bt. Ahmed nâm hâtun mahfil-i şer‘de işbu râfi‘atü’l-vesîka Emetullâh bt. Muslı nâm hâtun mahzarında ikrâr ve takrîr-i kelâm edip mezbûre Emetullâh Hâtun bundan akdem mahalle-i mezbûrede vâki‘ bir tarafdan Ali Yazıcı menzili ve bir tarafdan Mehmed Yazıcı menzili ve bir tarafdan Medîne-i Münevvere Vakfı olan menzil ve taraf-ı râbi‘den tarîk-i âm ile mahdûd bir bâb tahtânî oda ve bir mikdâr suyolu ve müşterek bi’r-i mâʼî ve sokak kapısını muhtevî mülk menzilinin nısf-ı şâyi‘ini bana kırk guruşa bey‘ ve semeni olan meblağ-ı mezbûr kırk guruşu yedimden ahz eylemiş idi hâlâ bey‘-i mezbûru bi’t-terâzî beynimizde ba‘de’l-fesh ve’l-ikāle ben menzil-i mahdûd-ı mezbûru mezbûre Emetullâh Hâtun’a red ve teslîm ol dahi semen-i mezbûr kırk guruşu bana def‘ u teslîm edip her birimiz ahz u kabz eyledik binâen alâ-zâlik hâlâ menzil-i mahdûd-ı mezkûr mezbûre Emetullâh Hâtun’un kemâ fi’l-evvel mülkü olup benim kat‘an alâka ve medhalim kalmamışdır keyfemâ teşâ ve tahtâr mutasarrıfa olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâmin min-Recebi’l-ferd li-sene 1137. Şuhûdü’l-hâl: Mahmud Efendi b. Abdullah el-imâm, Ahmed Çelebi b. Şa‘ban el-müezzin, Osman Çelebi b. Hasan, Ahmed Reis b. Nasuh, Ali Yazıcı b. Ahmed, Mehmed Yazıcı b. Ahmed, Ömer Beşe b. Osman.