Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 99 Hüküm no: 64 Orijinal metin no: [8a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Abdullah b. Abdülkerim’in menzil hissesini eşi Emine bt. Hüseyin’e sattığı Mahrûse-i Galata’da Şehsuvar mahallesinde sâkin el-Hâc Abdullah b. Abdülkerîm nâm kimesne meclis-i şer‘de hâlâ zevcesi olup mahalle-i mezbûrede sâkine Emine bt. Hüseyin b. Abdullah nâm hâtun tarafından ikrâr-ı âti’z-zikri tasdîka sâbitü’l-vekâle vekîli olan işbu râfi‘u’l-kitâb Ahmed Çelebi b. Mehmed nâm kimesne mahzarında ikrâr ve takrîr-i kelâm edip akd-i âtî sudûruna değin silk-i mülkümde münselik olup mahalle-i mezbûrede vâki‘ bir tarafdan Çolak Ahmed mülkü ve bir tarafdan Hüseyin Beşe mülkü ve bir tarafdan Emine Hâtun mülkü ve bir tarafdan tarîk-i âm ile mahdûd fevkānî üç bâb oda ve bir sofa ve tahta-pûş ve tahtânî bir bâb oda ve bir sofa ve bi’r-i mâ ve mahtab ve kenîfi müştemil mülk menzilimin nısf-ı şâyi‘ine zevcem müvekkile-i mezbûre Emine Hâtun’a tarafeynden îcâb ve kabûlü hâvî bey‘-i bâtt-ı sahîh-i şer‘î ile yüz elli guruşa bey‘ ve teslîm edip ol dahi ber-vech-i muharrer iştirâ ve tesellüm ve kabûl eyledikden sonra semeni olan meblağ-ı mezbûr yüz elli guruşa müte‘allika âmme-i de‘âvî ve mütâlebât ve eymân ve muhâsamâtdan zevcem müvekkile-i mezbûre Emine Hâtun’un zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm menzil-i mahdûd-ı mezkûrun nısf-ı şâyi‘i zevcem müvekkile-i mezbûre Emine Hâtun’un mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâbi‘ min-Recebi’l-ferd li-sene 1137. Şuhûdü’l-hâl: Arabzâde el-Hâc Ali, Yelkenci Kara Hasan, Kara Hacı Hasan, Mahmud Çelebi b. el-Hâc Mehmed, el-Hâc Ali b. Abdullah, Mustafa b. Ahmed, Ebûbekir b. Ahmed, Ahmed Ağa b. Mehmed.