Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 100 Hüküm no: 65 Orijinal metin no: [8a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Reis b. Hasan ile Hasan b. Osman’ın alacak davasında sulh oldukları Mahrûse-i Galata muzâfâtından kasaba-i Tophane’de Süheyl Bey mahallesinde sâkin sefîne reislerinden Mehmed Reis b. Hasan nâm kimesne meclis-i şer‘de tüccâr tâifesinden Hasan b. Osman nâm kimesne mahzarında ikrâr ve takrîr-i kelâm edip mezbûr Hasan târih-i kitâbdan dört sene mukaddem ale’l-iştirâki’s-seviy mülküm olan bir re’s Çerkes esîrini nakid yüz on guruş ile yirmi kantar keteni âhara bey‘ ve kabz-ı semen eylediğimden sonra nakd-i mezbûr yüz on guruşu beynimizde iktisâm eylediğimizden sonra mezbûr Hasan zikr olunan keteni dahi yüz iki guruşa âhara bey‘ ve kabz-ı semen etmeğle meblağ-ı mezbûrdan bana isâbet eden elli bir guruşu taleb eylediğimde mezbûr Hasan dahi zikr olunan keteni ancak altmış guruşa bey‘ini ikrâr ziyâde münkir olduğundan mâ‘adâ altmış guruşdan sana isâbet eden otuz guruşu dahi bundan akdem Akdeniz tarafına revâne olduğumda kasaba-i Fındıklı’da Pürtelaş Hasan mahallesinde sâkin olduğum menzilimde zevcem yedinde mahfûz iken bin yüz altı senesi Zilhicce’sinin on ikinci günü menzilimden sirkat olunmuş idi deyü def‘a tasaddî etmeğle beynimizde münâza‘ât-ı kesîre cereyân etmiş idi el-hâletü hâzihî beynimize muslihûn tavassut edip da‘vâ-yı mezkûre mezbûr Hasan ile beni on beş guruş üzerine inşâ-i akd-i sulh eylediklerinde ben dahi ber-vech-i muharrer sulh-i mezbûru kabûl ve bedel-i sulh olan meblağ-ı mezbûr on beş guruşu târih-i kitâbdan doksan bir gün tamâmına değin te’cîl eylediğimden sonra meblağ-ı mü’eccel-i mezbûr on beş guruşdan mâ‘adâ şirkete ve kefâlete müte‘allika âmme-i da‘vâdan her birimiz âharın zimmetini ibrâ ve ıskāt eyledik dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis min-Recebi’l-ferd li-sene 1137. Şuhûdü’l-hâl: İbrahim b. Muharrem, Halil b. Mustafa, Mustafa b. Ahmed, Ali b. Ahmed, Mehmed b. Ahmed, Süleyman b. Ahmed, Mehmed b. Ali.