Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 100 Hüküm no: 66 Orijinal metin no: [8a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva bt. Osman ile Ümmügülsüm bt. el-Hâc Ömer’in dava konusu olan menzilleri arasındaki yolun müşterek olduğu Husûs-ı âti’z-zikrin mahallinde keşf ve tahrîri bâbında fermân-ı âlî sudûruna binâen savb-ı şer‘-i enverden mevlânâ Mustafa Efendi b. Hasan me’zûnen irsâl olunup ol dahi hâssa mi‘mârlardan Üstâd Hasan Halife b. el-Hâc Ali ile mahrûse-i Galata muzâfâtından kasaba-i Fındıklı’da Perizat Hâtun mahallesinde vâki‘ zikri âtî tarîk-i hâs üzerine varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf-i nebevî eyledikde mahalle-i mezbûrede sâkin iken bundan akdem vefât eden el-Hâc Hüseyin b. el-Hâc Musa nâm kimesnenin verâseti zevce-i metrûkesi Havva bt. Osman nâm hâtuna ve sulbî sagīr evlâdı Mustafa ve Saliha ve Emetullâh ve Kerime’ye münhasıra olduğu lede’ş-şer‘i’l-enver zâhir ve mukarrer oldukdan sonra işbu râfi‘u’l-kitâb mezbûre Havva Hâtun kendi tarafından asâleten ve sıgār-ı mezbûrenin tesviye-i umûrlarına vasîleri olmağla vesayeten meclis-i ma‘kūd-ı mezbûrda câr-ı mulâsıkı Ümmügülsüm bt. el-Hâc Ömer b. Mustafa nâm hâtunun sadrî kebîr oğlu ve tarafından husûmet ve redd-i cevâba vekîli olduğu zât-ı mezbûreyi ma‘rifet-i şer‘iyye ile ârifân hâlâ zevci el-Hâc Receb b. Mustafa ve Mehmed Bey b. Abdullah nâm kimesneler şehâdetleriyle sâbit olan Halil Çelebi b. Mehmed nâm kimesne mahzarında bi’l-asâle ve bi’l-vesaye üzerine da‘vâ ve takrîr-i kelâm edip zevcim müteveffâ-yı mezbûr el-Hâc Hüseyin’in ile’l-vefât mülkü olup ba‘de vefâtihî benim ile sagīr evlâdı sagīrûn-ı mezbûrûn Mustafa ve Saliha ve Emetullâh ve Kerime’ye mevrûs olup işbu mu‘âyene olunan mülk menzil ile müvekkile-i mezbûre Ümmügülsüm Hâtun’un mülk menzili beynlerinde vâki‘ işbu sokak [8b] kapısından benim mülk menzilimin seddi duvarına varınca mi‘mâr-ı mezbûr mesâhasıyla tûlen otuz dört buçuk ve arzen sedd-i duvarı tarafında olan bir başı iki zirâ‘ ve sokak tarafında vâki‘ bir başı beş buçuk zirâ‘ işbu mu‘âyene olunan tarîk-i kadîmden benim menzilim ile müvekkile-i mezbûrenin menzili beynlerinde müşterek olup ve benim menzilimin tarîk-i âm tarafına kapısı olmağla tarîk-i hâss-ı mezbûrda olan kapısını bundan akdem mâliki olan kimesne kapayıp lâkin benim menzilimin râh-ı âbı ve çirkâb ve abdest suyunu bu âna gelince tarîk-i hâss-ı mezbûrdan cereyân edegelmiş iken müvekkile-i mezbûre Ümmügülsüm tarîk-i hâss-ı mezbûru mülkü olmak üzere müstakıllen zabt ve tasarruf etmeğin vekîl-i mezbûrdan suâl olunup kadîmi üzere iştirâken isti‘mâline tenbîh olunmak matlûbumdur dedikde gıbbe’s-suâl vekîl-i mezbûr cevâbında fi’l-vâki‘ anası müvekkile-i mezbûre tarîk-i mezbûru mülkü olmak üzere zabt ve tasarruf eylediğini ikrâr lâkin ber-vech-i muharrer tarîk-i hâs olduğunu inkâr edecek evvelen vekîl-i mezbûrun yedinde olan mübâya‘a hüccetlerinde tahrîr olunan hudûda nazar eyledikde bir tarafı tarîk-i hâs olduğu mastûr ve mukayyed olup ve sâniyen müdde‘iyye-i mezbûre Havva Hâtun’dan ber-vech-i muharrer müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden olup mahalle-i mezbûre sükkânından Mehmed Çelebi b. Mahmud ve İsmail Çelebi b. Süleyman ve Halil Yazıcı b. el-Hâc Mehmed nâm kimesneler li-ecli’ş-şehâde meclis-i mezbûra hâzırûn olup isre’l-istişhâd fi’l-vâki‘ işbu mu‘âyene olunan tarîk-i hâs kadîmden müdde‘iyye-i mezbûre Havva Hâtun menzili ile müvekkile-i mezbûre Ümmügülsüm’ün menzili beynlerinde müşterekdir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle tarîk-i hâss-ı mezbûru iştirâken zabt ve tasarrufa ba‘de’l-hükm ve’t-tenbîh vâki‘-i hâli mevlânâ-yı mezkûr mahallinde ketb ü tahrîr ve ma‘an ba‘s [olunan] Çukadâr Abdullah Beşe b. Mahmud ve Muhzır Ali Çelebi b. Ahmed ile mahfel-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu Fi’l-yevmi’s-sâlis min-Recebi’l-ferd li-sene 1137. Şuhûdü’l-hâl: İbrahim Efendi b. Abdullah el-imâm, Molla Abdullah b. Hüseyin el-müezzin, el-Hâc Mehmed b. Abdülhalim, el-Hâc Mehmed b. İbrahim, Mehmed Yazıcı b. el-Hâc Ahmed, Salih Çelebi b. İbrahim, İmâmzâde Mustafa Çelebi b. Abdullah, Mehmed Çelebi b. Süleyman, Halil Çelebi b. Mustafa, Mehmed Çelebi b. Hüseyin, Mehmed Çelebi b. Osman, el-Hâc Abdullah b. Ali, Mehmed Çelebi b. Osman, Osman Çavuş b. Mehmed, Ali Çelebi b. İbrahim, Abdullah Çelebi b. Mahmud, Ali Çelebi b. Ahmed, Yusuf Beşe b. Abdullah.