Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 102 Hüküm no: 67 Orijinal metin no: [8b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühâni bt. Hasan’ın es-Seyyid Hasan Çelebi’den muhalaa ile boşandığı Mahrûse-i Galata muzâfâtından kasaba-i Kasımpaşa’da Baş Hasan Efendi mahallesinde sâkine zâtı es-Seyyid Ali Çelebi b. Hasan ve es-Seyyid Ca‘fer b. es-Seyyid Ali nâm kimesneler ta‘rîfleriyle mu‘arrefe olan Ümmühâni bt. Hasan nâm hâtun meclis-i şer‘de zevc-i muhâlı‘ı işbu râfi‘u’l-kitâb es-Seyyid Hasan Çelebi b. es-Seyyid ( ) nâm kimesne mahzarında bi-tav‘ihâ ikrâr ve takrîr-i kelâm edip zevcim mezbûr es-Seyyid Hasan Çelebi ile beynimizde hüsn-i zindegânemiz olmayıp hul‘a tâlibe ve râgıbe olduğum cihetle zimmetinde mütekarrır ve ma‘kūdün-aleyh olan üç bin yüz akçe mehr-i mü’eccelimden fâriğa olup nafaka-i iddet ve me’ûnet-i süknâm dahi kendi üzerime olmak üzere mezbûr es-Seyyid Hasan Çelebi ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-i mezbûru kabûl eyledikden sonra hukūk-ı zevciyyete müte‘allika âmme-i da‘vâdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sânî aşer min-Recebi’l-ferd li-sene 1137. Şuhûdü’l-hâl: es-Seyyid Ali Ağa b. Hasan, es-Seyyid Ca‘fer Çelebi b. es-Seyyid Ali, İbrahim b. Muharrem, Halil b. Mustafa, Mustafa b. Ahmed, Mustafa b. Receb.