Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 103 Hüküm no: 69 Orijinal metin no: [8b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Mehmed b. İbrahim ile Mehmed Beşe b. Ali’nin alacak davasında sulh oldukları Mahmiye-i İstanbul’da Kadıçeşmesi kurbünde sâkin el-Hâc Mehmed b. İbrahim b. Abdullah nâm kimesne tarafından zikri âtî sulh ve ibrâyı ikrâra vekîli olduğu Halil Beşe b. Yahya ve Mustafa Çelebi b. İbrahim nâm kimesneler şehâdetleriyle mahzar-ı hasm-ı câhidde şer‘an sâbit ve vekâletine hükm-i şer‘î lâhik olan İbrahim Çelebi b. İsmail nâm kimesne meclis-i şer‘de işbu râfi‘u’l-kitâb Mehmed Beşe b. Ali nâm kimesne mahzarında bi’l-vekâle ikrâr ve takrîr-i kelâm edip müvekkilim mezbûr el-Hâc Mehmed’in mezbûr Mehmed Beşe zimmetinde cihet-i karz-ı şer‘îden yedi yüz guruş hakkı olmağla meblağ-ı mezbûru mezbûr Mehmed Beşe’den ba‘de’d-da‘vâ ve’l-inkâr müvekkilim mezbûr müdde‘âsını beyâna adem-i kudretinden nâşî mezbûr Mehmed Beşe’yi tahlîf sadedinde olduğu cihetle beynlerinde münâza‘ât-ı kesîre vâkı‘a olmuş idi el-hâletü hâzihî beynlerinde muslihûn tavassut edip müvekkilim mezbûr Mehmed da‘vâ-yı mezkûresinden mezbûr Mehmed Beşe ile an-inkâr fedâen li’l-yemîn yüz kırk guruş üzerine inşâ-i akd-i sulh eylediklerinde ben dahi ber-vech-i muharrer sulh-i mezbûru kabûl ve bedel-i sulh olan meblağ-ı mezbûr yüz kırk guruşu mezbûr Mehmed Beşe yedinden tamâmen ahz u kabz eylediğinden sonra müvekkilim mezbûr el-Hâc Mehmed mâ‘adâsı olan beş yüz altmış guruşa müte‘allika da‘vâdan mezbûr Mehmed Beşe’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledikde mezbûr Mehmed Beşe dahi bedel-i sulh olmak üzere medfû‘u olan yüz kırk guruşa müte‘allika da‘vâdan müvekkilim mezbûr el-Hâc Mehmed’in zimmetini kezâlik ibrâ-i âmm ile ibrâ ve ıskāt eyledi dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’t-tâsi‘ min-Recebi’l-ferd li-sene 1137. Şuhûdü’l-hâl: Mehmed Efendi b. İbrahim, Tahtacı Halil Beşe b. Abdullah, el-Hâc Osman b. Abdullah, el-Hâc Bekir b. el-Hâc Yahya, Davud Beşe b. Abdullah, Mustafa b. İbrahim, Molla Mehmed b. İbrahim, İbrahim b. İsmail.