Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 104 Hüküm no: 70 Orijinal metin no: [8b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Ağa b. Osman’ın eşi Fethi bt. Abdullah’la müşterek menzillerini el-Hâc İbrahim b. Abdullah’a istiğlâl yoluyla satıp ödünç para aldıkları Mahrûse-i Galata’da Alacamescid mahallesinde sâkin Hüseyin Ağa b. Osman nâm kimesne kendi tarafından asâleten ve zevcesi Fethi bt. Abdullah b. Abdülmennân nâm hâtun tarafından husûs-ı âti’z-zikre vekîl olduğu zât-ı mezbûreyi ma‘rifet-i şer‘iyye ile ârifân Mustafa Çelebi b. Yusuf ve Molla Mehmed b. el-Hâc Veli nâm kimesneler şehâdetleriyle mahzar-ı hasm-ı câhidde şer‘an sâbit olmağla vekâleten meclis-i şer‘de işbu râfi‘u’l-kitâb el-Hâc İbrahim b. Abdullah nâm kimesne mahzarında bi’l-asâle ve bi’l-vekâle ikrâr ve takrîr-i kelâm edip zevcem müvekkile-i mezbûre Fethi Hâtun ile ale’l-iştirâki’s-seviy silk-i mülkümde münselik olup mahrûse-i mezbûre a‘mâlinden İstinye kasabasında Kürkcübaşı mahallesinde vâki‘ bir tarafdan Veli Ali veresesi mülkleri ve bir tarafdan Süklüm zevcesi Ümmühâni Hâtun menzili ve iki tarafdan tarîk-i âm ile mahdûd fevkānî iki bâb oda ve bir matbah ve tahtında ahur ve bi’r-i mâ ve kenîf ve eşcâr-ı müsmire ve gayr-i müsmireli bahçeyi müştemil mülk menzilimi mezbûr el-Hâc İbrahim’e bi-tarîki’l-istiğlâl yüz guruşa bey‘ u teslîm eylediğimde ol dahi ber-vech-i muharrer iştirâ ve tesellüm ve kabûl eyledikden sonra semeni olan meblağ-ı mezbûr yüz guruşu mezbûr el-Hâc İbrahim yedinden tamâmen ahz u kabz eylediğimden sonra mezbûr el-Hâc İbrahim menzil-i mahdûd-ı mezkûru ba‘de’t-tahliyeti’ş-şer‘iyye ve’t-tekābuzi’l-mer‘î târih-i kitâbdan bir sene tamâmına değin on beş guruşa bana îcâr ve teslîm eyledikde ben dahi ber-vech-i muharrer istîcâr ve kabûl eyledim dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâni aşer min-Recebi’l-ferd li-sene 1137. Şuhûdü’l-hâl: Mustafa Odabaşı b. el-Hâc Hasan, Süleyman Hoca b. Mehmed, Oturakcı el-Hâc Mustafa, Oturakcı Mehmed Ağa, İbrahim b. Muharrem, Halil b. Mustafa, İbrahim b. Mustafa ve gayrühum.