Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 104 Hüküm no: 71 Orijinal metin no: [9a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola Dafin v. Anderya’nın Sakızlı Pandali v. Dimitraki’ye olan borcunu Simonite bt. Todori ile gönderdiği Zikri âtî husûsa şâhid-i asl olan mellâh tâifesinden Rodosi Yorgi v. Nikola v. Marko ve Sakızlı Bâli v. Kosta v. Nikola zimmîler meclis-i şer‘de mahrûse-i Galata’da sâkin Attar Hüseyin Çelebi b. Abdullah ve Haffaf İbrahim Ağa b. Abdullah ve Mehmed Çelebi b. İlyas ve İbrahim Çelebi b. Süleyman ve diğer İbrahim Çelebi b. Mehmed nâm kimesneler mahzarlarında ikrâr ve takrîr-i kelâm edip târih-i kitâbdan yedi sene üç ay mukaddem İngiliz sefînesiyle Akdeniz’de vâki‘ Alikurna cezîresine vardığımızda cezîre-i mezbûre ahâlîsinden olup hâlâ hâlik olduğu mesmû‘umuz olan Nikola Dafin v. Anderya v. Nikola nâm zimmî tüccâr tâifesinden târih-i mezbûrda ticâret tarîki ile Mısr-ı Kahire’ye tâbi‘ İskenderiye İskelesi’nde sâkin olan işbu hâmilü’r-rakīm Sakızlı Pandali v. Dimitraki için benim merkūm Pandali’ye bundan akdem yedinden iştirâ ve kabz eylediğim ecnâs ve a‘dâd ve evsâfları beynimizde ilm-i şer‘î ile ma‘rûf keten ve penbe ve câmûs ve kara sığır gönleri bahâlarından cem‘an zimmetimde beş bin yedi yüz altmış sekiz guruş deynim vardır deyü huzûrumuzda ikrâr ve bizi işhâd eyledikden sonra merkūm Nikola deyn-i mezkûru için işbu merkūm Pandali’ye irsâl etmek üzere zevce-i menkûhası olup hâlâ medîne-i İzmir’de sükûnı mesmû‘umuz olan Simonite bt. Todori v. ( ) nâm Nasrâniyeye bizim huzûrumuzda mâlından iki bin üç yüz soltaya[zolataya] def‘ u teslîm eyledikde zevcesi merkūme Simonite dahi yedinden alıp kabz eyledi biz bu husûsa bu vecih üzere şâhidleriz şehâdet dahi ederiz lâkin bizim için diyâr-ı âhara gitmek iktizâ etmeğle sizin her birinizin bizim her birimizin insânından şehâdet-i mezkûremize şâhid olun ve mahallinde edâ-i şehâdet-i şer‘iyye etdik deyü merkūmân Ro[d]oslu Yorgi ve Sakızlı Pandali’de her biri şehâdet-i merkūmelerini mezbûrûn Hüseyin Çelebi ve İbrahim Ağa ve Mehmed Çelebi ve İbrahim Çelebi ve diğer İbrahim Çelebi’den her birine tahmîl eylediklerinde onlardan her biri dahi zimmiyân-ı merkūmânın şehâdetlerini ber-vech-i muharrer tahammül ve mahallinde edâ-i şehâdet-i şer‘iyye etmeğe ta‘ahhüd ve iltizâm etmeleriyle mâ-vaka‘a bi’l-ibtigā ketb olundu. Fi’l-yevmi’l-âşir min-Recebi’l-ferd li-sene 1137. Şuhûdü’l-hâl: İbrahim Çelebi b. Muharrem, Halil Çelebi b. Mustafa, Mustafa Çelebi b. Mustafa, Mustafa b. Ahmed, İbrahim b. Mustafa, Mehmed b. Ahmed, Ali b. Ahmed ve gayrühum.