Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 105 Hüküm no: 72 Orijinal metin no: [9a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Meryem bt. Nasuh’un annesi Saime Hatun’un tasarrufunda olan verasetinden oğlu Osman ile eski kocası Yusuf Ağa’nın hisselerinin verilmesi Mahrûse-i Galata hâricinde Kalafatcıbaşı mahallesinde sâkine iken bundan akdem vefât eden Meryem bt. Nasuh b. Ali nâm hâtunun verâseti zevc-i metrûku Yusuf Ağa b. Ahmed nâm kimesneye ve sadrî sagīr oğlu Osman ve anası Saime bt. Sefer nâm hâtuna münhasıra ve tashîh-i meselesi bi-hükmi’l-ferâiz on iki sehimden olmağla sihâm-ı mezbûreden üç sehmi mezbûr Yusuf Ağa’ya ve iki sehmi mezbûre Saime Hâtun’a ve yedi sehmi sagīr-i mezbûr Osman’a isâbet eylediği lede’ş-şer‘i’l-enver zâhir ve mukarrer oldukdan sonra mezbûr Yusuf Ağa meclis-i şer‘de işbu râfi‘atü’l-kitâb mezbûre Saime Hâtun mahzarında üzerine da‘vâ ve takrîr-i kelâm edip zevcem müteveffât-ı mezbûrenin hîn-i vefâtında ben diyâr-ı âharda bulunduğum cihetle kāyın anam mezbûre Saime tereke-i müteveffât-ı mezbûrenin mecmû‘ mâlını ahz u kabz etmeğle hâlâ suâl olunup tereke-i müteveffât-ı mezbûreden benim ile sagīr oğlum Osman’ın hissesini bana teslîme tenbîh olunmak matlûbumdur dedikde ve akībe’l-inkâr müdde‘î-i mezbûrdan ber-vech-i muharrer müdde‘âsını mübeyyine beyyine taleb olundukda ityân-ı beyyineden izhâr-ı acz eylediğinden mâ‘adâ yedinde olan kassâm defterine nazar olundukda müteveffât-ı mezbûrenin terekesine li-ebeveyn er karındaşı ve vasiyy-i muhtâr olup hâlâ gāib ani’l-beled Mehmed b. Nasuh nâm kimesne ma‘rifet-i şer‘le kabz eylediği mastûr olmağın müdde‘î-i mezbûr bilâ-vech-i şer‘î mezbûre Saime Hâtun’a mu‘ârazadan men‘ birle mâ-hüve’l-vâkı‘ bi’l-ibtigā ketb olundu. Fi’l-yevmi’l-âşir min-Recebi’l-ferd li-sene 1137. Şuhûdü’l-hâl: es-Sâbikūn.