Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 106 Hüküm no: 73 Orijinal metin no: [9a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hanım bt. Ahmed Paşa’nın Çerkes asıllı kölesi Hatim bt. Abdullah’ı azat ettiği Mahmiye-i İstanbul’da Unkapanı kapısı dâhilinde vâki‘ Demirhan mahallesinde sâkine Emine Hânım bt. Ahmed Paşa b. Mehmed tarafından ıtk-ı câi’z-zikri ikrâra vekîli olduğu zât-ı mezbûreyi ma‘rifet-i şer‘iyye ile ârifân Mustafa Çelebi b. Mehmed ve Veli Bey b. Hasan nâm kimesneler şehâdetleriyle şer‘an sâbit ve vekâletine hükm-i şer‘î lâhik olan Mustafa Çelebi b. Mehmed mahfil-i şer‘de müvekkile-i mezbûre Emine Hânım’a rıkkını mu‘terife olan orta boylu açık kaşlı kara gözlü Çerkesiyyetü’l-asl Müslimetü’l-mille bâ‘isetü hâzihi’l-kabâle Hatim bt. Abdullah muvâcehesinde bi’l-vekâle ikrâr ve takrîr-i kelâm edip müvekkilem mezbûre Emine Hânım câriye-i memlûkesi olan mevsûfe-i mezbûre Hatim’i hasbeten lillâhi te‘âlâ ve haseneten li-rûhi resûli’l-mu‘allâ mâlından tahrîr ve i‘tâk ve kayd-ı rıkkiyyetden ihrâc ve ıtlâk eyledi ba‘de’l-yevm mevsûfe-i mezbûre Hatim sâir ahrâr-ı asliyyât gibi hürre olup üzerinde velâ-i şer‘iyyeden gayri hakkı kalmadı dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâbi‘ min-Recebi’l-ferd li-sene 1137. Şuhûdü’l-hâl: Süleyman Efendi b. Mustafa el-imâm, İbrahim b. Muharrem, Halil b. Mustafa, Mustafa b. Ahmed, Mehmed b. Ahmed, Ali b. Ahmed.