.:: İstanbul Kadı Sicilleri ::.


Galata Mahkemesi 259 Numaralı Sicil (H. 1137-1138 / 1724-1725)
cilt: 63, sayfa: 106
Hüküm no: 74
Orijinal metin no: [9a-4]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Mehmed b. Mustafa’nın darb davasında Hasan b. İbrahim ile sulh oldukları

Mahrûse-i Galata hâricinde Müeyyedzâde mahallesinde sâkin Mehmed b. Mustafa nâm kimesne meclis-i şer‘de Hasan b. İbrahim nâm kimesne tarafından zikri âtî sulh ve ibrâya vekîli olduğu Süleyman b. Ya‘kub ve İbrahim b. Abdullah nâm kimesneler şehâdeteriyle sâbit olan işbu râfi‘u’l-kitâb İbrahim b. Ahmed nâm kimesne mahzarında ikrâr ve takrîr-i kelâm edip müvekkil-i mezbûr Hasan târih-i kitâbdan beş gün mukaddem mahrûse-i mezbûrede Karaköy sûkında ba‘de’z-zuhr âlet-i cârihadan beyaz kabzalı bıçak ile sağ ve sol omzum başlarından iki yerimden amden bi-gayrı hakkın beni darb ve cerh eylemiş idi diye müvekkil-i mezbûrdan mûceb-i şer‘îsini bundan akdem ba‘de’d-da‘vâ ve’l-inkâr ben müdde‘âmı müvekkil-i mezbûr muvâcehesinde şuhûd-ı udûl ile vech-i şer‘î üzere isbât eyleyip mûceb-i şer‘îsi ber’-i tâmm husûlüne tevkīf olunmuş idi el-hâletü hâzihî beynimize muslihûn tavassut edip da‘vâ-yı mezkûremden beni müvekkil-i mezbûr Hasan ile on üç guruş üzerine inşâ-i akd-i sulh eylediklerinde ben dahi ber-vech-i muharrer sulh-i mezbûru kabûl ve bedel-i sulh olan meblağ-ı mezbûru vekîl-i mezbûr yedinden tamâmen ahz u kabz eylediğimden sonra ben cerh-i mezbûra ve mâ tehaddese anhuya müte‘allika âmme-i da‘vâdan müvekkil-i mezbûr Hasan’ın zimmetini ibrâ-i âmm-ı kātı‘u’n-nizâ‘la ibrâ ve ıskāt eylediğimde vekîl-i mezbûr dahi bedel-i sulh olmak üzere bana medfû‘u olan meblağ-ı mezbûr on üç guruşa müte‘allika âmme-i da‘vâdan kezâlik benim zimmetimi ibrâ ve ıskāt eyledi dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu.

Fi’l-yevmi’l-hâmis aşer min-Recebi’l-ferd li-sene 1137.

Şuhûdü’l-hâl: İbrahim b. Muharrem, Halil b. Mustafa, Mustafa b. Ahmed, Mehmed b. Ahmed, Ali b. Ahmed ve gayrühum.