Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 107 Hüküm no: 75 Orijinal metin no: [9a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstefan v. Yorgi’nin ölen Sakızlı Yakomi v. Zani’deki alacağını kefili Sedri v. İstefan’ın ödeyeceği Sakız cezîresi ahâlîsinden olup mahrûse-i Galata hâricinde Dörtyolağzı nâm mahallde sâkin işbu râfi‘u’r-rakīm İstefan v. Yorgi nâm zimmî meclis-i şer‘de yine cezîre-i mezbûre ahâlîsinden olup tüccâr tâifesinden Sedri v. İstefani nâm zimmî muvâcehesinde üzerine da‘vâ ve takrîr-i kelâm edip târih-i kitâbdan üç sene mukaddem yedimde olan molâya ta‘bîr olunur işbu deyn temessükü nâtık olduğu üzere iki buçuk sene mukaddem Hâslar kazâsına tâbi‘ Silivri kasabası kurbünde Tatarhan Çiftliği’nde hâlik olan Sakızlı Yakomi v. Zani v. Yakop nâm zimmîye kendi menzilimde cedîd zolata olmak üzere mâlımdan iki bin beş yüz guruş ikrâz ve teslîm eylediğimde ol dahi ber-vech-i muharrer iktirâz ve kabz ve masârıfına[9b] sarfla ba‘de’l-istihlâk merkūm Sedri dahi meblağ-ı mezbûr iki bin beş yüz guruşa hâlik-i merkūmun emriyle kefîl ve dāmin olmuş idi binâen aleyh hâlâ merkūm Sedri’den suâl olunup meblağ-ı mezbûru bi-hükmi’l-kefâle bana edâ ve teslîme tenbîh olunmak matlûbumdur dedikde gıbbe’s-suâl ve akībe’l-inkâr müdde‘î-i merkūmdan ber-vech-i muharrer müdde‘âsını mübeyyine beyyine taleb olundukda udûl-i Nasârâ’dan olup mahmiye-i İstanbul’da Vâlide Hânı’nda mütemekkin tüccar tâifesinden Sakızlı Dimitri v. Pandali ve Galata’da Sultan Bayezid mahallesinde sâkin Tabîb diğer Dimitri v. Agusi nâm zimmîler li-ecli’ş-şehâde meclis-i şerîfe hâzırân olup isre’l-istişhâd fi’l-vâki‘ müdde‘î-i merkūm İstafan ber-minvâl-i muharrer târih-i kitâbdan üç sene mukaddem hâlik-i merkūm Yakomi v. Zan v. Yakomi’ye Dörtyolağzı nâm mahalde vâki‘ sâkin olduğu menzilinde bizim huzûrumuzda ber-mûceb-i temessük mâlından iki bin beş yüz guruşluk cedîd zolata ikrâz ve teslîm ol dahi ber-vech-i muharrer iktirâz ve tesellüm ve masârıfına sarfla ba‘de’l-istihlâk işbu merkūm Sedri dahi meblağ-ı mezbûr iki bin beş yüz guruşa hâlik-i merkūmun emriyle yine huzûrumuzda kefîl ve dāmin olup bizi işhâd eylediler biz bu husûsa bu vecih üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri hîn-i kabûlde vâkı‘a olup ve müdde‘î-i merkūm meblağ-ı mezbûru hâlik-i merkūmdan hayâtında ahz u istîfâ veyâhud âhara havâle veyâhud hibe eylemeyip bir vechile zimmetini ibrâ eylemediğine ba‘de’t-tahlîfi’ş-şer‘î mûcebiyle meblağ-ı mezbûr iki bin beş yüz guruşu bi-hükmi’l-kefâle müdde‘î-i mezbûra edâ ve teslîme mersûm Sedri’ye tenbîh birle mâ-hüve’l-vâkı‘ bi’l-ibtigā ketb olundu. Fi’l-yevmi’s-sânî aşer min-Recebi’l-ferd li-sene 1137. Şuhûdü’l-hâl: Veli Çavuş b. Mustafa, Osman Çavuş b. Ali, İbrahim Çelebi b. Muharrem, Halil Çelebi b. Mustafa, Mustafa b. Ahmed, Ali b. Mehmed, Antuvan v. Yani, Pandali v. Dimitri.