Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 108 Hüküm no: 76 Orijinal metin no: [9b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çadırcı Musa Çelebi b. Hüseyin’in vârisleri ile mütevelli Molla Hasan b. el-Hâc Mehmed’in sulh oldukları Husûs-ı âti’z-zikrin mahallinde keşf ve tahmîni iltimâs olunmağın savb-ı şer‘-i enverden mevlânâ Mustafa Efendi b. Hasan me’zûnen irsâl olunup ol dahi hâssa mi‘mârlarından Üstâd İbrahim Halife b. Mustafa ile mahrûse-i Galata muzâfâtından kasaba-i Kasımpaşa’da el-Hâc Hüsrev mahallesinde sâkin Solak Mehmed Ağa b. Musa nâm kimesnenin menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf-i nebevî eyledikde mahalle-i mezbûrede vâki‘ merhûm Dizdar Ahmed Mescid-i şerîfi Vakfı’na ber-vech-i hasbî mütevellî olduğu hâlde bundan akdem vefât eden Çadırcı Musa Çelebi b. Hüseyin nâm kimesnenin verâseti zevce-i metrûkesi Ümmühâni bt. Mehmed nâm hâtuna ve sulbî kebîr oğulları Ahmed ve Ali nâm kimesnelere ve sulbiye kebîre kızı Fâtıma nâm hâtuna münhasıra ve tashîh-i meselesi bi-hükmi’l-ferâiz kırk sehimden olmağla sihâm-ı mezbûreden beş sehmi mezbûre Ümmühâni Hâtun’a ve on dörder sehmi mezbûrân Ahmed ve Ali’den her birine ve yedi sehmi mezbûre Fâtıma’ya isâbet eylediği lede’ş-şer‘i’l-enver zâhir ve mukarrer oldukdan sonra zâtları el-Hâc Mehmed Ağa b. Musa ve el-Hâc Mustafa b. Abdullah ta‘rîfleriyle mu‘arrefe olan mezbûretân Ümmühâni ve Fâtıma asâleten ve mezbûr Ahmed kendi tarafından asâleten ve karındaşı mezbûr Ali tarafından husûs-ı âti’l-beyâna vekîl olduğu mu‘arrefân-ı mezbûrân el-Hâc Mehmed Ağa ve el-Hâc Mustafa şehâdetleriyle sâbit olmağla vekâleten meclis-i ma‘kūd-ı mezbûrda mescid-i mezbûrun berât-ı sultânî ile imâmı ve vakfının kıbel-i şer‘den ber-vech-i hasbî mütevellîsi olan işbu râfi‘u’l-kitâb Molla Hasan b. el-Hâc Mehmed nâm kimesne mahzarında her biri bi’l-asâle ve bi’l-vekâle ikrâr ve takrîr-i kelâm edip mûrisimiz müteveffâ-yı mezbûr Çadırcı Musa’nın zamân-ı tevliyetinde gallesi mescid-i mezbûr imâmlarına meşrûta vakıf olan bir tarafdan odalar ve bir tarafdan mescid-i mezbûr hizâsında vâki‘ arsa ve bir tarafdan bostan ve bir tarafdan tarîk-i hâss ile mahdûd arsa üzerine izn-i şer‘le vakfa bi-şartı’r-rücû‘ mâlıyla binâ eylediği üç bâb müteehhilîn odalarına olan masrûfunu mi‘mâr-ı mezbûr ma‘rifet-i şer‘-i şerîf ile zeyl-i kitâbda muharrerü’l-esâmî Müslimîn huzûrlarında keşf ve mesâha eyledikde zikr olunan odalardan mezbûr el-Hâc Mehmed Ağa’nın vakf-ı mezbûrdan tasarrufunda olan arsa tarafında vâki‘ tûlen on ve arzan altı bi-hesâb-ı terbî‘ altmış zirâ‘ arsa üzerinde vâki‘ fevkānî bir bâb oda ve bir sofa ve tahtânî ve kenîfin her zirâ‘ı 180 akçeden 10800 akçeye ve yine menzil-i mezbûra muttasıl tûlen on buçuk ve arzen altı buçuk bi-hesâb-ı mezbûr 68 zirâ‘ arsa üzerinde vâki‘ fevkānî bir bâb oda ve bir sofa ve tahtânî bir bâb oda ve bir kenîfin her zirâ‘ı 180 akçeden 12240 akçe ve yine menzil-i mezbûra muttasıl mescid-i şerîf tarafında kâin tûlen on buçuk ve arzen altı buçuk bi-hesâb-ı mezbûr 68 zirâ‘ arsa üzerinde vâki‘ fevkānî bir bâb oda ve bir sofa ve tahtânî bir bâb oda ve kenîfin her zirâ‘ı 180 akçeden 12240 akçe ki cem‘an müteveffâ-yı mezbûrun masrûfu 35280 akçeye bâliğ olup ve müteveffâ-yı mezbûr meblağ-ı mezbûrun 5000 akçesini ber mûceb-i i‘lâm menâzil-i mezbûrenin enkāz-ı mevcûdesinden 19600 akçesini zikri sebk eden odalardan mescid-i mezbûr tarafında olan odanın icâre-i mu‘accelesinden ve sekiz bin yedi yüz altmış akçesini Hasan nâm kimesneye îcâr eylediği odanın kezâlik icâre-i mu‘accelesinden ve iki bin dört yüz akçesini yine vakf-ı mezbûrdan dâmâdı mezbûr Solak Mehmed Ağa’ya îcâr eylediği vakıf bahçe arsası mu‘accelesinden olmak üzere taraf-ı vakıfdan hayâtında ahz u istîfâ edip masârıf-ı merkūmeden taraf-ı vakıfda bâkī kalan 9520 akçe hakkını istîfâ etmeksizin vefât etmeğin biz dahi bi’l-asâle ve bi’l-vekâle müteveffâ-yı mezbûr Molla Hasan’dan taleb ve da‘vâ sadedinde olduğumuz cihetle beynimizde münâza‘ât-ı kesîre cereyân etmiş idi el-hâletü hâzihî beynimize muslihûn tavassut edip müteveffâ-yı mezbûr Molla Hasan ile bizi 3360 akçe üzerine inşâ-i akd-i sulh eylediklerinde biz dahi her birimiz bi’l-asâle ve bi’l-vekâle sulh-i merkūmu kabûl ve bedel-i sulh-i mezbûru hâlâ taraf-ı vakıfda adem-i müsâ‘adeden nâşî ba‘de zamânin düşen mahlûlünden ahz u istîfâ etmek üzere mütevellî-i mezbûr Molla Hasan kendi mâlından bize edâ ve teslîm edip biz dahi her birimiz bi-kadri’l-hısas yedinden ahz u kabz ve mâ‘adâsı olan altı bin yüz altmış akçeyi rızâmız ile vakfa teberru‘ eylediğimizden sonra husûs-ı mezbûra müte‘allika âmme-i da‘vâdan taraf-ı vakf-ı mezbûr ile mütevellî-i mezbûr Molla Hasan’ın zimmetini ibrâ her birimiz bi’l-asâle ve bi’l-vekâle ibrâ ve ıskāt eyledik dediklerinde gıbbe’t-tasdîki’ş-şer‘î vâki‘ hâli mevlânâ-yı mezkûr mahallinde ketb u tahrîr ve ma‘an ba‘s olunan Çukadâr Hasan Beşe b. Abdullah ve Muhzır Mustafa b. Ahmed ile mahfel-i şer‘a gelip alâ-vukū‘ihî inhâ ve takrîr etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’l-hâmis min-Recebi’l-ferd li-sene 1137 Şuhûdü’l-hâl: es-Seyyid Yahya Efendi b. es-Seyyid Mustafa el-imâm, Mahmud b. Ahmed, es-Seyyid Mustafa Çelebi b. Musa, el-Hâc Mehmed Efendi b. Hüseyin el-müezzin, Mehmed Ağa b. Musa, Osman b. Abdullah, el-Hâc Mustafa b. Abdullah, es-Seyyid Mehmed b. Ahmed, Hasan b. Receb, İsmail b. Receb, Hamza b. Veli, Hasan b. Abdullah, Hüseyin b. Hasan.