Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 110 Hüküm no: 77 Orijinal metin no: [9b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Ağa b. Mustafa Kapudan’ın menzilini Fatıma bt. Mustafa’ya sattığı Mahrûse-i Galata[‘da] Sultan Bayezid mahallesinde sâkin Mahmud Ağa b. Mustafa Kapudan mahfil-i şer‘de Fâtıma bt. Mustafa b. Abdülkerîm nâm hâtunun kebîr oğlu ve tarafından bey‘-i âti’l-beyânı tasdîka vekîli olduğu el-Hâc Osman b. Mehmed ve Abdullah Çelebi b. Süleyman nâm kimesneler şehâdetleriyle şer‘an sâbit olan işbu râfi‘u’l-vesîka İbrahim Çelebi b. Mehmed nâm kimesne mahzarında ikrâr ve takrîr-i kelâm edip akd-i âtî sudûruna değin yedimde mülküm olup mahalle-i mezbûrede vâki‘ bir tarafdan Debbâğ Ahmed Çelebi mülkü ve bir tarafdan Ömer Çelebi tasarrufunda olan vakıf menzil ve bir tarafdan müşterek damlalık arsası ve bir tarafdan tarîk-i âm ile mahdûd ulyâda iki bâb oda ve bir matbah ve dehlîz ve tahta-pûş vüstâda bir bâb oda ve bir matbah ve dehlîz ve kenîf ve abdesthâne süflâda bir bâb oda ve bi’r-i mâ ve bir mikdâr eşcârı [ve] havluyu müştemil mülk menzilimi bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile müvekkile-i mezbûre Fâtıma Hâtun’a üç yüz guruşa bey‘ ve teslîm eylediğimde ol dahi ber-vech-i muharrer iştirâ ve tesellüm ve kabûl eyledikden sonra semeni olan meblağ-ı mezbûru müvekkile-i mezbûre yedinden tamâmen alıp kabz eyledim ba‘de’l-yevm menzil-i mahdûd-ı merkūm bi-cümletin mâ yeştemilühû ve yahvîhi müşteriye-i merkūme Fâtıma Hâtun’un mülk-i müşterâsı olmuşdur keyfemâ teşâ ve tahtâr mutasarrıfa olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’r-râbi‘ aşer min-Recebi’l-ferd li-sene 1137. Şuhûdü’l-hâl: İmâm Ali Efendi, es-Seyyid Mehmed b. es-Seyyid Mehmed, Müezzin Molla Ali, Debbâğ Osman Çelebi b. Hasan, el-Hâc Ali b. Süleyman, el-Hâc Osman b. Mehmed, Abdullah Çelebi b. Süleyman, Salih b. Mehmed, Halil b. Mustafa.