Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 110 Hüküm no: 78 Orijinal metin no: [10a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. Halil b. Abdullah’ın evinin vârisleri tarafından Salih Beşe b. İsmail’e satıldığı Mahrûse-i Galata muzâfâtından kasaba-i Beşiktaş’da Sinan Paşa mahallesinde sâkin iken bundan akdem vefât eden İbrahim b. Halil b. Abdullah’ın verâseti zevce-i metrûkesi Âişe bt. Abdülmennân b. Abdullah nâm hâtun ile sulbî kebîr oğulları Halil ve Mehmed ve Mustafa nâm kimesnelere ve sulbiye sagīre kızı Fâtıma’ya münhasıra ve tashîh-i meselesi bi-hükmi’l-ferâiz sekiz sehimden i‘tibâr olunur sihâm-ı mezbûreden bir sehmi mezbûre zevcesi mezbûre Âişe Hâtun’a ve ikişer sehmi oğulları mezbûrûn Halil ve Mehmed ve Mustafa’dan her birine ve bir sehmi sagīre-i mezbûre Fâtıma’ya isâbet eylediği mezbûre Âişe Hâtun sagīre-i mezbûrenin tesviye-i umûruna kıbel-i şer‘den mansûb vasîsi olduğu lede’ş-şer‘i’l-enver zâhir ve mukarrer oldukdan sonra mezbûr Halil kendi tarafından asâleten ve karındaşları mezbûrân Mustafa ile anaları mezbûre Âişe Hâtun taraflarından bey‘-i âti’z-zikre vekîlleri olduğu <> mezbûre Âişe Hâtun’un zâtını ma‘rifet-i şer‘iyye ile ârifân İsmail b. Halil ve Mustafa b. Mehmed nâm kimesneler şehâdetleriyle mahzar-ı hasm-ı câhidde şer‘an sâbit ve vekâletine hükm-i şer‘î lâhik olan vekâleten meclis-i şer‘de işbu râfi‘u’l-kitâb Salih Beşe b. İsmail nâm kimesne mahzarında bi’l-asâle ve bi’l-vekâle ikrâr ve takrîr-i kelâm edip babam müteveffâ-yı mezbûrun ile’l-vefât yedinde mülkü olup ba‘de vefâtihî bana ve verese-i mezkûresine mevrûs olan mahrûse-i Galata a‘mâlinden İstinye nâhiyesine tâbi‘ Zekeriya nâm karyede vâki‘ bir tarafdan Küçük Mehmed menzili ve bir tarafdan Çelikoğlu Ali menzili ve bir tarafdan câmi‘-i şerîf vakfı olan bahçe ve bir tarafdan tarîk-i âm ile mahdûd fevkānî bir bâb oda ve bir sagīr sofa ve tahtında ahur ve bir fırın ve kenîf ve bir mikdâr havluyu müştemil mülk menzil kabîl-i kısmet olmadığından nâşî ber-tashîh-i mezbûr üzere menzil-i merkūmda olan mikdâr-ı mezkûr hisse-i irsiyyelerimizi âhara bey‘ murâd edip ve sagīre-i merkūmenin hissesini ifrâz bir vechile mümkin olmamağla mezbûrenin dahi hisse-i irsiyyesini verese-i kibâr ile ma‘an âhara bey‘ hakkında her vechile hayr ve nâfi‘ olmağın ben dahi isâbet ve vekâlet-i mahkiyelerim hasebiyle menzil-i mahdûd-ı merkūmu bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Salih Beşe’ye yirmi guruşa bey‘ u temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yirmi guruşu mezbûr Salih Beşe yedinden tamâmen alıp kabz eylediğimden sonra ba‘de’l-yevm menzil-i mahdûd-ı mezkûrun bi-cemî‘i mâ yeştemilühû ve yahvîhi müşterî-i mezbûr Salih Beşe’nin mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki bi’l-ibtigā ketb olundu. Fi’l-yevmi’l-hâmis aşer min-Recebi’l-ferd li-sene 1137. Şuhûdü’l-hâl: Hüseyin Beşe b. İbrahim, el-Hâc Hüseyin b. Ahmed, İsmail Ağa b. Emrullah, Ahmed Ağa b. Ali, Bölükbaşıoğlu Mehmed b. Uzun İsmail.