Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 112 Hüküm no: 79 Orijinal metin no: [10a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abraham v. Kirkor’un Avanos v. Serkis ile kızı Sima hakkındaki davasından feragat ettiği Mahrûse-i Galata’da Bereketzâde mahallesinde sâkin Abraham v. Kirkor nâm Ermeni meclis-i şer‘de işbu râfi‘u’r-rakīm Avanos v. Serkis nâm Ermeni muvâcehesinde ikrâr ve takrîr-i kelâm edip merkūm Avanos’a bundan akdem sulbiye-i kebîre kızı Sima nâm Ermeniyeyi bana tezvîc etmek üzere nişân nâmıyla mâlımdan on beş cedîd İstanbul altunu vermiş idim deyü da‘vâya tasaddî eylemiş idim el-hâletü hâzihî da‘vâ-yı mezkûremden bi’l-külliye fâriğ olduğumdan sonra meblağ-ı mezbûr on beş cedîd İstanbul altununa müte‘allika âmme-i da‘vâdan merkūm Avanos ile kızı merkūme Sima’nın zimmetlerini ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm merkūm Avanos ile zikr olunan on beş altuna ve kızına müte‘allik vechen mine’l-vücûh ve sebeben mine’l-esbâb da‘vâ ve nizâ‘ım yokdur dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâlis aşer min-Recebi’l-ferd li-sene 1137. Şuhûdü’l-hâl: Halil Çavuş b. İbrahim, Berber Usta Mehmed, Hasan Ağa b. Mehmed, Kirkor v. Asvador, Nikogos v. Kanan, Asvador v. Sahi, Ohan v. Aleksan.