Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 112 Hüküm no: 80 Orijinal metin no: [10a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Amed v. Anton’un terekesi Filyos’un tasarrufunda olduğundan hissedarlardan ölen Nazlı’nın hissesinin kocası Bedros’a teslimi Fi’l-asl vilâyet-i Anadolu’da Eğin kazâsına tâbi‘ Ançıa? karyesi ahâlîsinden olup mahmiye-i İstanbul’da Vâlide Hânı’nda mütemekkin iken bundan akdem hâlik olan Amed v. Anton v. Daruş nâm Ermeni’nin verâseti zevce-i metrûkesi Gül bt. Arnavud nâm Ermeniye ye ve sulbî kebîr oğlu Filibos’a ve kebîre kızları Mardin ve Meryem ve Ava ve Nazlı’ya münhasıra ve tashîh-i meseleleri bi-hükmi’l-ferâiz kırk sekiz sehimden mu‘teber olup sihâm-ı mezbûreden altı sehmi merkūme Gül’e ve on dört sehmi mezbûr Filibos’a ve yedişer sehmi merkūmât Mardin ve Ava ve Nazlı’dan her birine isâbet eyleyip ve ba‘dehû merkūme Nazlı dahi hâlike olmağla verâseti zevci Bedros ve anası mezbûre Gül ve li-ebeveyn er karındaşı merkūm Filyos ve li-ebeveyn kız karındaşları mezbûrât Mardin ve Meryem ve Ava’ya münhasıra olduğu lede’ş-şer‘i’l-enver zâhir ve mukarrer oldukdan sonra merkūm Bedros v. Arniton v. Arakil tarafından ber-vech-i âtî vekâlet iddi‘â eden işbu hâmilü’r-rakīm Asvador v. Kiragos nâm Ermeni meclis-i şer‘de hâlik-i evvel merkūm Amid’in terekesine bi’l-verâse vâzı‘u’l-yed olan merkūm Filibos muvâcehesinde üzerine da‘vâ ve takrîr-i kelâm [edip] merkūm Bedros bundan akdem diyâr-ı âhara azîmeti esnâsında zevcesi hâlike-i merkūme Nazlı’ya babası [hâlik]-i evvel merkūm Amed’in terekesinden tashîh-i mezbûr üzere isâbet ve intikāl eden yedi sehm hisse-i irsiyye-i şer‘iyyesinden kendüye isâbet eden nısf hisse-i irsiyyesini merkūm Filibos ile sâir vâzı‘u’l-yed olanlardan taleb ve da‘vâ ve ahz u kabz ve kendüye îsâle ve lede’l-iktizâ sulh ve ibrâya ve umûr-ı mezkûra mütevakkıfa olduğu husûsların küllîsine tarafından beni vekîl ve nâib-i menâb nasb ve ta‘yîn eyledikde ben dahi ber-vech-i muharrer vekâlet-i mezbûreyi kabûl ve hıdemat-ı lâzımesini mahallinde ikāmete ta‘ahhüd eylediğim cihetle el-ân mezbûr Filibos’dan suâl olunsun dedikde gıbbe’s-suâl mezbûr Filibos cevâbında babası hâlik-i evvel mezbûr Amed’in terekesine bi’l-verâse vaz‘-ı yedini ikrâr lâkin merkūm Asvador’un gāib-i mezbûr Bedros tarafından vekâlet-i meşrûhasını inkâr eylediğinden mâ‘adâ ben karındaşım hâlike mezbûre Nazlı’ya hâl-i hayâtında babam hâlik-i merkūm Amed’in terekesinden tashîh-i mezbûr üzere yedi sehm hisse-i şer‘iyyesine isâbet eden bin iki yüz elli guruşu kendüye def‘ u teslîm edip ol dahi yedimden tamâmen alıp kabz eyledi binâen aleyh hâlike-i mezbûre Nazlı’ya yine babası hâlik-i merkūmun terekesinden isâbet eden mikdâr-ı mezkûr hisse-i irsiyyesinden yedimde bir akçe ve bir habbe bâkī kalmamışdır deyü def‘le mukābele edicek gıbbe’l-istintâk ve’l-inkâr evvelâ merkūm Asvador’dan gāib-i mezbûr Bedros tarafından ber-vech-i muharrer vekâletine beyyine taleb olundukda udûl-i Nasârâ’dan olup mahmiye-i İstanbul’da Aksaray’da sâkin Sarraf Markar v. Panos ve Divanyolu’nda Ekmekçi Tatyanos v. Oloşin nâm Ermeniler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ mezbûr Bedros v. Ariton v. Erakil bundan akdem diyâr-ı âhara azîmeti esnâsında zevcesi hâlike-i mezbûre Nazlı’ya babası hâlik-i evvel merkūm Amid v. Anton v. Dravuş’un terekesinden tashîh-i mezbûr üzere isâbet ve intikāl eden yedi sehm hisse-i irsiyye-i şer‘iyyesinden kendüye isâbet eden nısf hisse-i şer‘îsini merkūm Filyos ile sâir vâzı‘u’l-yed olanlardan taleb ve da‘vâ ve ahz u kabz ve kendüye îsâle ve lede’l-iktizâ sulh ve ibrâya ve umûr-ı mezkûra mütevakkıfa olduğu husûsların küllîsine bizim huzûrumuzda taraflarından merkūm Asvador’u vekîl ve nâib-i menâb nasb ve ta‘yîn eyledikde ol dahi ber-vech-i muharrer vekâlet-i [10b] mezbûreyi kabûl ve hıdemât-ı lâzımesini kemâ yenbağī ikāmete ta‘ahhüd eyledi biz bu husûsa bu vecih üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle mezbûr Asvador’un vekâlet-i mahkiyesine hüküm olunup ve sâniyen mezbûr Filyos’dan def‘-i mezkûrunu mübeyyine beyyine taleb olundukda ityân-ı beyyineden izhâr-ı acz etmeğin hâlik-i evvel merkūm Amid’in terekesinden hâlik[e] mezbûre Nazlı’ya isâbet ve intikāl eden yedi sehm hisse-i irsiyye-i şer‘iyyesinden zevci gāib-i mezbûr Bedros’a isâbet eden nısf hisse-i şer‘iyyesine vekîl-i mezbûra teslîme mezbûr Filibos’a tenbîh birle mâ-hüve’l-vâkı‘ bi’l-ibtigā ketb olundu. Fî-evâsıt-ı Recebi’l-ferd li-sene 1137. Şuhûdü’l-hâl: İbrahim b. Muharrem, Halil b. Mustafa, Mustafa b. Receb, İbrahim b. Mustafa, Sırmakeş Mustafa, Süleyman b. Ahmed, Aşçı el-Hâc Mehmed, Bekir Beşe.