Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 114 Hüküm no: 81 Orijinal metin no: [10b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla Halil b. İbrahim’in vakıf menzilinin el-Hâc Ömer Efendi b. Mehmed ile Hammami el-Hâc İbrahim tarafından kiralandığı Husûs-ı âti’l-beyânın mahallinde keşf ü taksîm ve tahrîri iltimâs olunmağın savb-ı şer‘-i enverden mevlânâ Halil Efendi b. Hüseyin me’zûnen bi’l-keşf irsâl olunup ol dahi hâssa mi‘mârlardan es-Seyyid Mustafa Halife b. Eyüb ve Mehmed Halife [b.] İsmail ile haffâf tâifesinden Molla Halil b. İbrahim’in mahrûse-i Galata’da Câmi‘-i Kebîr mahallesinde vâki‘ sâkin olduğu zikri câî vakıf menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf-i nebevî eyledikde mezbûr Molla Halil meclis-i ma‘kūd-ı mezbûrda umdetü’l-eimme el-Hâc Ömer Efendi b. Mehmed ve Hammâmî el-Hâc İbrahim b. Mustafa mahzarlarında ashâb-ı hayrâtdan merhûm Emin Hayreddin Bey’in Yalakâbâd’da vâki‘ câmi‘-i şerîfi vakfına bi’l-fi‘il mütevellî olan Ali Efendi b. Mustafa hâzır olduğu hâlde ikrâr ve takrîr-i kelâm edip merhûm-ı mezbûr Emin Hayreddin Bey’in vakfından olup zikr olunan Câmi‘-i Kebîr mahallesinde vâki‘ bir tarafdan hamâm ve bir tarafdan ba‘zen hamâm-ı mezbûr odunluğu ve ba‘zen mezbûr el-Hâc Ömer Efendi menzili ve bir tarafdan ba‘zen vakf-ı mezbûrdan Çörekçi menzili ve bir tarafdan tarîk-i âm ile mahdûd fevkānî iki bâb oda ve dehlîz ve tahtında kenîf ve eşcâr-ı müsmire ve gayr-i müsmireli bahçe arsasını müştemil vakıf menzil icâre-i mu‘accele ve beher şehr yirmi akçesi benim ve beş akçesi mezbûr el-Hâc İbrahim’in olmak üzere cem‘an elli akçe icâre-i mü’eccele <> ile iştirâken tasarrufumuzda olup ve menzil-i mezbûrun gerek taht-ı binâda ve gerek bahçede olan mecmû‘ arsası mi‘mârân-ı mezbûrân mesâhalarıyla tûlen ve arzan bi-hesâb-ı terbî‘ dört yüz on üç zirâ‘ olmağla menzil-i mezbûrun binâ ve arsasının 413 zirâ‘dan terbî‘an 165 zirâ‘ı bana ve kırk bir buçuk zirâ‘ı mezbûr el-Hâc Ömer Efendi’ye ve iki yüz altı buçuk zirâ‘ hisse-i merkūmesi mukābelesinde ancak arsadan terbî‘an 64 zirâ‘ arsaya tâlib ve râzı olup ve mezbûr el-Hâc İbrahim dahi kezâlik menzil-i mezbûrun binâ ve arsasına olan terbî‘an iki yüz altı buçuk zirâ‘ hisse-i şer‘iyyesi mukābelesinde ancak arsadan terbî‘an 208 zirâ‘ arsasına râzı olur ve menzil-i mezbûru vech-i muharrer üzere beynimizde tevzî‘ ve taksîm vakfa dahi muzır olmamağın mi‘mârân-ı mezbûrân dahi menzil-i mevkūf-ı mezbûrun bahçe arsasından olup bir tarafdan ba‘zen hamâm-ı mezbûr odunluğu ve ba‘zen mezbûr el-Hâc Ömer Efendi menzili ve bir tarafdan yine mezbûr el-Hâc Ömer Efendi menzili ve bir tarafdan menzil-i mahdûd-ı merkūm için ta‘yîn olunan arsa ve bir tarafdan el-Hâc İbrahim hissesine ta‘yîn olunan arsa ile mahdûd tûlen ve arzan 8 zirâ‘ bi-hesâb-ı terbî‘ 64 zirâ‘ arsa ifrâz ve ber-vech-i muharrer binâ ve arsada olan kırk bir buçuk zirâ‘ arsası mukābelesinde mezbûr el-Hâc Ömer Efendi’ye teslîm olunup ve yine bahçe-i merkūme arsasından olup bir tarafdan vakf-ı mezbûr hamâm ve bir tarafdan hamâm-ı merkūm odunluğu ve bir tarafdan ba‘zen mezbûr el-Hâc Ömer Efendi’nin arsa-i müfreze-i merkūmesi ve ba‘zen benim sâkin olduğum menzil-i mezbûr ve bir tarafdan tarîk-i âm ile mahdûd tûlen ve arzan bi-hesâb-ı terbî‘ 208 zirâ‘ arsa ifrâz ve binâ ve arsada olan iki yüz altı buçuk zirâ‘ hisse-i merkūmesi mukābelesinde mezbûr el-Hâc İbrahim’e teslîm olundukda mezbûrândan her biri dahi rızâlarıyla ahz u kabz ve teslîm ve kabûl eylediler ba‘de’l-yevm bâlâda zikr u beyân olunduğu üzere terbî‘an 165 zirâ‘ arsa üzerinde olan ebniye ayda 315 akçe icâre-i mü’eccele ile benim tasarrufumda ve terbî‘an 64 zirâ‘ arsa-i mahdûde-i müfreze-i merkūme ayda 5 akçe icâre-i mü’eccele ile mezbûr el-Hâc Ömer Efendi tasarrufunda ve terbî‘an 208 zirâ‘ arsa-i mahdûde-i müfreze merkūma ayda 25 akçe icâre-i mü’eccele ile mezbûr el-Hâc İbrahim tasarrufunda olup her birimiz âharın hissesine dahl u ta‘arruz eylemeye dedikde mezbûrân el-Hâc Ömer Efendi ve el-Hâc İbrahim dahi mezbûr Molla Halil’i ikrâr-ı meşrûhunda vicâhen tahkīk ve şifâhen tasdîk eylediklerinden sonra vâki‘ hâli mevlânâ-yı mezkûr mahallinde ketb ü tahrîr ve ma‘an ba‘s olunan İbrahim b. Mustafa ve Bursalı Mehmed b. Ahmed ile mahfel-i şer‘a gelip alâ-vukū‘ihî inhâ ve takrîr etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis min-Recebi’l-ferd li-sene 1137. Şuhûdü’l-hâl: es-Seyyid Mehmed Emin b. es-Seyyid Abdülkerîm, el-Hâc İsmail b. Mehmed, es-Seyyid Mustafa Halife b. Eyüb, Mehmed Halife b. İsmail, Attar el-Hâc Abdullah, Şerbetçi el-Hâc Osman, İbrahim b. Mustafa.