Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 115 Hüküm no: 82 Orijinal metin no: [10b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Afife Hatun bt. Ahmed’in eşyalarını annesi Hadice bt. Ahmed’e satmadığı, Hadice Hatun’un kocası Molla Mehmed’den nafaka aldığı Mahrûse-i Galata hâricinde Firuzağa mahallesinde sâkine iken bundan akdem müteveffiye olan Afife Hâtun bt. Ahmed b. Ahmed’in verâseti anası Hadice bt. Ahmed nâm hâtun ile sadrî kebîr oğlu Abdülkerîm’e münhasıra ve meselesi bi-hükmi’l-ferâiz altı sehimden i‘tibâr olunup sihâm-ı mezbûreden bir sehmi mezbûre Hadice Hâtun’a ve beş sehmi sagīr-i mezbûr Abdülkerîm’e isâbeti tahakkukundan sonra sagīr-i mezbûr Abdülkerîm’in babası ve tesviye-i emrini rü’yete kıbel-i şer‘den mansûb vasîsi Molla Mehmed b. el-Hâc Mehmed meclis-i şer‘de işbu râfi‘atü’l-vesîka merkūme Hadice Hâtun mahzarında bi’l-vesaye ikrâr ve takrîr-i kelâm edip müteveffât-ı mezbûre Afife Hâtun hâl-i hayâtında eşyâ-yı memlûkesinden 10 çatma yasdık ve 5 minder ve 4 kumaş mak‘ad ve bir hatâyî zar ve bir dikme yorgan ve bir sandal yorgan ve 6 kapaklı sahan ve bir işleme ocak perdesi ve bir işleme çuka kapı perdesi ve bir inci askılı üçer ayaklı bir çift zümrüd küpe ve 5 yaftalı bir inci kuşak ve bir çift altun bilezik ve inci ve zümrüd mahlût beşer ayaklı bir çift altun küpe ve bir yeşil çuka biniş ve telli keremsûd ve kaftan ma‘a anteri ve eşyâ-yı sâire-i ma‘lûmesini 1135 senesi Recebü’l-ferd 24 günü işbu mahkeme-i kübrâda bâb nâibi olan Ahmed Efendi huzûrunda anası merkūme Hadice Hâtun’a yüz guruş semen-i makbûza bey‘ u teslîm ve yedine hüccet-i şer‘iyye verilmiş iken ben bey‘-i mezbûr muvâza‘aten olmuş idi deyü mezbûre Hadice Hâtun’dan ba‘de’d-da‘vâ ve’l-inkâr müdde‘âmı bir vechile beyâna adem-i kudretimden nâşî da‘vâ-yı mezkûremden fâriğ olduğumdan mezbûre Hadice Hâtun dahi bi-hükmi’l-hıdâne hacr ve terbiyesinde olan sagīr oğlum mezbûr Abdülkerîm için mukaddemâ kıbel-i şer‘den benim üzerime farz ve takdîr eylediği yevmî üçer para nafakanın yevmî ikişer parasını edâya iktidârım olmadığından nâşî rızâsıyla hat ve tenzîl edip ve ba‘de’l-yevm sagīr-i mezbûru hakk-ı hıdâne sükūtuna değin beher yevm birer para ile infâk ve iksâ eyleyip birer paradan ziyâde benden bir akçe ve bir habbe nafaka taleb eylememek üzere ta‘ahhüd ve iltizâm eyledi dedikde mezbûre Hadice Hâtun dahi mukırr-ı mezbûr Molla Mehmed’i ikrâr-ı meşrûhunda tahkīk ve tasdîk etmeğin mâ-hüve’l-vâkı‘ bi’l-ibtigā ketb olundu. Fî-21 Receb sene 1137. Şuhûdü’l-hâl: Hasan Efendi b. Ali, el-Hâc Ahmed b. Süleyman, el-Hâc Mehmed b. Mehmed, el-Hâc Mehmed b. Abdullah, Kapukethüdası Ali Beşe b. Mustafa, İsmail Beşe b. Mehmed, Abdurrahman b. Halil, Halil b. Yusuf, Bekir Beşe b. Süleyman.