Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 116 Hüküm no: 83 Orijinal metin no: [11a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. A‘ma Mustafa Dede b. Abdullah boşandığı Ayşe bt. Abdullah’ın Süleyman Beşe ile nikahlandığı Mahrûse-i Galata muzâfâtından kasaba-i Tophane’de Karabaş Mustafa Ağa mahallesinde sâkine Âişe bt. Abdullah nâm hâtundan ber-vech-i âtî istihbâr-ı şer‘î sudûrundan sonra udûl-i ahrâr-ı ricâl-i Müslimînden olup mahalle-i mezbûre sâkinlerinden Mustafa b. Mehmed ve diğer Mustafa b. Osman nâm kimesneler li-ecli’l-ihbâr meclis-i şer‘a hâzırân olup isre’l-istişhâd fi’l-vâki‘ işbu müstahbire-i mezbûre Âişe Hâtun’un zevci A‘mâ Mustafa Dede b. Abdullah b. Abdülkerîm nâm kimesne ile beynlerinde adem-i hüsn-i mu‘âşeretden nâşî hul‘a tâlibe olmağla mehr-i mü’eccelinden fâriğa olup nafaka-i iddet ve me’ûnet-i süknâsını kendi üzerine olmak mezbûr A‘mâ Mustafa Dede’nin mahmiye-i İstanbul’da Edirnekapısı kurbünde sâkin olduğu menzilde târih-i kitâbdan yedi sene mukaddem bizim huzûrumuzda muhâla‘a oldular deyü muhzırân-ı mezbûrândan her biri keyfiyet-i muharrereyi alâ-tarîki’ş-şehâde haber verdiklerinden sonra mezbûre Âişe Hâtun meclis-i şer‘de işbu râfi‘u’l-kitâb Süleyman Beşe b. Mehmed nâm kimesne mahzarında takrîr-i kelâm ve ta‘bîr ani’l-merâm edip ben nefsimi bin beş yüz akçe mehr-i mü’eccel ile mezbûr Süleyman Beşe’ye tezvîc ve tenkîh eylediğimde ol dahi ber-vech-i muharrer tezevvüc ve kabûl eyledi dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’t-tâsi‘ aşer min-Recebi’l-ferd li-sene 1137. Şuhûdü’l-hâl: Kollukcu es-Seyyid Hüseyin Ağa b. Hasan, Subaşı Ali Çelebi b. Hızır, İbrahim b. Muharrem, Halil b. Mustafa, Mustafa b. Ahmed, Mehmed b. Ahmed, Mustafa b. Receb.