Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 117 Hüküm no: 84 Orijinal metin no: [11a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye Hatun Vakfı’na ait yıkılan menzil arsası üzerine Mehmed Çelebi b. Yusuf tarafından inşa edilen menzile fiyat takdiri yapıldığı Husûs-ı âti’z-zikrin mahallinde keşf ve tahmîni iltimâs olunmağın savb-ı şer‘den mevlânâ Mustafa Efendi b. Hasan me’zûnen irsâl olunup ol dahi hâssa mi‘mârlardan Üstâd es-Seyyid Hüseyin Halife b. Ömer ve Ali Halife b. Ahmed ile mahrûse-i Galata muzâfâtından Tophane’de Muhyiddin Efendi mahallesi ahâlîsinden Mehmed Çelebi b. Yusuf nâm kimesnenin sâkin olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf-i nebevî eyledikde işbu sâhibü’l-kitâb mezbûr Mehmed Çelebi meclis-i ma‘kūd-ı mezbûrda mezbûre Safiye Hâtun Vakfı’na meşrûtiyet üzere bi’l-fi‘il mütevellî olan es-Seyyid Abdullah Efendi b. es-Seyyid Ahmed hâzır olduğu hâlde takrîr-i kelâm ve ta‘bîr ani’l-merâm edip yedimde olan memhûr mütevellî temessükü nâtık olduğu üzere merhûme mezbûre Safiye Hâtun’un beher sene Ramazân-ı şerîfde salât-ı terâvih tervîhalarında birer aşr-ı şerîf ve bir hatm-i şerîf tilâvet etmek üzere tevliyet ve gallesini mezbûr es-Seyyid Abdullah Efendi’ye meşrûta vakfı olup mahalle-i mezbûrede vâki‘ bir tarafdan Saliha Hâtun mülkü ve bir tarafdan Kara el-Hâc Mehmed menzili ve iki tarafdan tarîk-i âm ile mahdûd arsası tûlen ve arzan bi-hesâb-ı terbî‘i 350 zirâ‘ olan vakıf menzili mürûr-ı eyyâm ile harâb ve vîrân olup bir vechle kābil-i süknâ olmadığından mâ‘adâ ta‘mîr ve termîme taraf-ı vakıfda kat‘an kudret ve müsâ‘ade olmayıp ve icâre-i mu‘accelesine mahsûb olmak üzere binâya kimesne rağbet etmemeğin mütevellî-i mezbûr es-Seyyid Abdullah Efendi enkāz-ı mevcûdesini mukaddemâ ma‘rifet-i şer‘le 23 guruşa bana bey‘ ve kabz-ı semen ve arsasını dahi senevî 24 akçe mukāta‘a ile bana îcâr ve teslîm ve yedime temessük vermeğin ben dahi arsa-i mevkūfe-i mezbûre üzerine bâ-izn-i mütevellî mâlım ile mülküm olmak üzere müceddeden bin menzil binâ eylemiş idim hâlâ nazar olunup menzil-i mezbûrun ebniyesine olan masrûfumun mertebe-i tahammülü tahmîn-i sahîh ile tahmîn ve takvîm olunmak matlûbumdur dedikde mevlânâ-yı mezbûr dahi mi‘mârân-ı mezbûrân ve ebniye-şinâs Müslimûn-ı hâzırûn ile menzil-i mezbûra nazar eylediklerinde hâl bi’l-cümle mezbûr Mehmed Çelebi’nin takrîr-i meşrûhu üzere olduğu mu‘âyene ve müşâhede ve mütevellî-i mezbûr es-Seyyid Abdullah Efendi dahi mezbûr Mehmed Çelebi’yi akvâl-i meşrûhasında bi’l-cümle tasdîk eyledikden sonra mi‘mârân-ı mezbûrân Hüseyin Halife ve Ali Halife menzil-i mezbûru mesâha eylediklerinde tûlen yirmi yedi buçuk ve arzan on bi-hesâb-ı terbî‘i 275 zirâ‘ arsa üzerinde kâin billur camlı ve sülügen boyalı ve labneli ve pervazlı ve çiftli tabaka-i ulyâda iki bâb oda ve bir matbah ve kenîf ve tabaka-i vüstâda kezâlik sülügen boyalı ve labne ve pervazlı bir bâb oda ve bir matbah ve kenîf ve abdesthânenin her zirâ‘ı dörder yüz seksener akçeden bir yük otuz iki bin akçe ve bir zîr-i zemîni ber-vech-i tahmîn 2000 akçe ve bi-hesâb-ı mezbûr 130 zirâ‘ mefrûş kaldırımın her zirâ‘ı 12 akçeden 1560 akçe ve bir kuyu bileziği 300 akçe ve bir kapı bileziği 200 akçe ve ihrâc-ı …? ve hammâliye ve çarh-ı sepet ve kürek 3000 akçe ki min haysü’l-mecmû‘ ebniye-i merkūme yüz otuz sekiz bin yedi yüz altmış akçe ile ancak olur noksân ile olmak mümkün değildir deyü mi‘mârân-ı mezbûrân ve Müslimûn-ı hâzırûn icmâ‘ ve ittifâk eylediklerinden sonra vâki‘ hâli mevlânâ-yı mezbûr mahallinde ketb ü tahrîr ve ma‘an ba‘s olunan Çukadâr Mehmed Beşe b. Mehmed ve muhzır Molla Mehmed b. Yusuf ile meclis-i şer‘a gelip alâ-vukū‘ihî inhâ ve takrîr etmeğin mâ [hüve’l-]vâki‘ bi’l-ibtigā ketb olundu. Fi’l-yevmi’l-hâmis min-Recebi’l-ferd li-sene 1137. Şuhûdü’l-hâl: Osman Efendi b. Abdullah el-imâm, Veli Efendi b. Veli, Mustafa Çelebi b. İbrahim el-müezzin, Mustafa Çelebi b. Mustafa, Mustafa Çelebi b. Hüseyin, el-Hâc Ali b. Osman, Mehmed Odabaşı b. Ahmed, Mehmed Çelebi b. Halil, İbrahim Çelebi b. Derviş, Mehmed Çelebi b. Ali, Yusuf b. Abdullah, Hasan Beşe b. Abdullah, Abdulbâki Çelebi b. Mustafa, Mehmed Beşe b. Mustafa, Ahmed Halife b. Mehmed el-kayyum, Mehmed Çelebi b. el-Hâc Ali, Müezzinzâde Mehmed Çelebi b. Mehmed, Süleyman b. Abdullah, İbrahim Çelebi b. Halil, Mehmed Beşe b. Mustafa.