Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 118 Hüküm no: 85 Orijinal metin no: [11a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yelkenci el-Hâc Hasan’ın oğulları Mustafa ve Hasan’a intikal eden menzilin el-Hâc Ahmed b. Ali’ye istiğlâl yoluyla satıldığı Mahrûse-i Galata muzâfâtından kasaba-i Tophane’de Muhyiddin Efendi mahallesinde es-Seyyid Mehmed Çelebi b. Yusuf nâm kimesne meclis-i şer‘de merhûm Yelkenci el-Hâc Hasan nâm kimesnenin sagīr evlâdı Mustafa ve Hasan’ın tesviye-i umûrlarına vasîleri olan işbu râfi‘u’l-vesîka el-Hâc Ahmed b. Ali nâm kimesne mahzarında ikrâr ve takrîr-i kelâm edip hâlâ silk-i mülkümde münselik olup mahalle-i mezbûrede vâki‘ bir tarafdan Saliha Hâtun mülkü ve bir tarafdan Kara el-Hâc Mehmed menzili ve iki tarafdan tarîk-i âm ile mahdûd tabaka-i ulyâda iki bâb oda ve bir sofa ve bir matbah ve dehlîz ve tabaka-i vüstâda bir bâb oda ve bir matbah ve dehlîz ve kenîf ve süflâda bir bâb oda ve iki kenîf ve abdesthâne ve zîr-i zemîn ve bir bi’r-i mâ ve bir mikdâr bahçeyi müştemil arsasının merhûme Safiye Hâtun Vakfı’na senevî iki yüz kırk akçe mukāta‘a-i kadîmesi olan mülk menzilimi işbu bin yüz otuz yedi senesi Muharremü’l-harâmı gurresinde vasiyy-i mezbûr el-Hâc Ahmed’e bi-tarîki’l-istiğlâl iki yüz elli guruşa bey‘ u teslîm edip ol dahi ber-vech-i muharrer iştirâ ve tesellüm ve kabûl eyledikden sonra meblağ-ı mezbûr iki yüz elli guruşa sagīrân-ı mezbûrân Mustafa ve Hasan’ın mâllarından olmak üzere vasiyy-i mezbûr el-Hâc Ahmed yedinden tamâmen ahz u kabz eylediğimden sonra vasiyy-i mezbûr el-Hâc Ahmed menzil-i mahdûd-ı mezkûru ba‘de’t-tahliyeti’ş-şer‘iyye ve’t-tekābuzi’l-mer‘î senevî otuz yedişer buçuk guruş olmak üzere târih-i mezbûrdan iki sene tamâmına değin yetmiş beş guruşa bana îcâr ve teslîm eylediğinde ben dahi ber-vech-i muharrer istîcâr ve kabûl eyledim dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâlis ve’l-ışrîn min-Recebi’l-ferd li-sene 1137. Şuhûdü’l-hâl: es-Sâbikūn.