Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 119 Hüküm no: 86 Orijinal metin no: [11b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Lütfullah Efendi’nin vefatıyla hissesine el koyan Berber Ahmed Çelebi’nin hisseyi varislerine iade etmesi Mahrûse-i Galata muzâfâtından kasaba-i Tophane’de Ekmekçibaşı mahallesinde sâkin iken bundan akdem vefât eden Terzi el-Hâc Mehmed b. Abdülmennân b. Abdullah’ın verâseti sulbî kebîr oğlu el-Hâc Lütfullah Efendi ile sulbiye kebîre kızı Emetullâh nâm hâtuna münhasıra olup kable’l-kısme mezbûr el-Hâc Lütfullah Efendi dahi vefât edip verâseti zevce-i menkûhası diğer Emetullâh bt. Mehmed nâm hâtun ile sulbî kebîr oğlu Mehmed’e ve sulbiye kebîre kızları Fâtıma ve Ümmügülsüm ve Zeyneb ve Rabia ve Havva’ya münhasıra ve tashîh-i meseleleri bi-hükmi’l-münâsahati’ş-şer‘iyye on iki sehimden i‘tibâr olunup sihâm-ı mezbûreden dört sehmi mezbûre Emetullâh Hâtun’a ve bir sehmi diğer Emetullâh Hâtun’a ve iki sehmi mezbûr Mehmed’e ve birer sehmi mezbûrât Fâtıma ve Ümmügülsüm ve Zeyneb ve Havva’dan her birine isâbeti tahakkukundan sonra işbu râfi‘u’l-kitâb mezbûr Mehmed ile anası mezbûre diğer Emetullâh’a asâleten ve mezbûrât Fâtıma ve Ümmügülsüm ve Zeyneb ve Rabia ve Havva taraflarından zikri âtî da‘vâya vekîlleri olduğu mezbûrâtın zâtlarını ma‘rifet-i şer‘iyye ile ârifân İbrahim Beşe b. Ali ve Süleyman Çelebi b. Mehmed nâm kimesneler şehâdetleriyle mahzar-ı hasm-ı câhidde şer‘an sâbit ve vekâlete hükm-i şer‘î lâhik olan Salih Çelebi b. Mehmed nâm kimesne vekâleten meclis-i şer‘de Berber Ahmed Çelebi b. Mehmed nâm kimesne mahzarında her biri bi’l-asâle ve bi’l-vekâle üzerine da‘vâ ve takrîr-i kelâm edip mahalle-i mezbûrede vâki‘ bir tarafdan Arabzâde mülkü ve bir tarafdan Hadice Hâtun tasarrufunda olan vakıf menzil ve bir tarafdan ba‘zen Ramazan ve ba‘zen Hüseyin nâm kimesneler tasarruflarında olan vakıf menziller ve bir tarafdan tarîk-i âm ile mahdûd fevkānî iki bâb oda ve bir sofa ve kenîf ve mağsel ve tahtânî bir bâb harâb oda ve kenîf ve mahtab ve bi’r-i mâ ve bir mikdâr bahçeyi müştemil mülk menzil müteveffâ-yı evvel-i mezbûrun ile’l-vefât yedinde mülkü olup ba‘de vefâtihî menzil-i mezbûrun tashîh-i mezbûr üzere on iki sehimden sekiz sehmi müteveffâ-yı sânî el-Hâc Lütfullah Efendi’nin verese-i mezkûresine mevrûs olmuş iken mezbûr Berber Ahmed Çelebi bi-gayrı hakkın vaz‘-ı yed eder suâl olunup kasr-ı yedine tenbîh olunmak bi’l-asâle ve bi’l-vekâle murâdımdır dediklerinde gıbbe’s-suâl mezbûr Berber Ahmed Çelebi cevâbında fi’l-vâki‘ menzil-i mahdûd-ı merkūmu yedimde olan bir kıt‘a mübâya‘a hücceti mantûkunca târih-i kitâbdan bir buçuk sene mukaddem kāinanam mezbûre Emetullâh Hâtun müstakıllen kendi mülkü olmak üzere bana yüz elli guruşa bana bâtten bey‘ u teslîm edip ben dahi ber-vech-i muharrer iştirâ ve tesellüm ve kabûl eylediğim cihetle hâlâ menzil-i mahdûd-ı mezkûre mülk-i müşterâm olmak üzere vaz‘-ı yed ederim deyü lâkin menzil-i mezbûr ber-vech-i muharrer mezbûr Terzi el-Hâc Mehmed’in yedinde mülkü olup ba‘de vefâtihî verese-i mezkûresine mevrûs olduğunu inkâr edicek müdde‘iyyûn-ı mezbûrûndan vech-i muharrer üzere müdde‘âlarını mutâbıka beyyine taleb olundukda udûl-i ahrâr-ı ricâl-i müslimînden mahalle-i mezbûre sâkinlerinden es-Seyyid Ahmed Çelebi b. es-Seyyid Hüseyin ve es-Seyyid Mustafa b. Ömer ve Ahmed Çelebi b. Hasan nâm kimesneler li-ecli’ş-şehâde meclis-i şer’a hâzırûn olup isre’l-istişhâd fi’l-hakīka zikr olunan Ekmekçibaşı mahallesinde vâki‘ bir tarafdan Arabzâde mülkü ve bir tarafdan Hadice Hâtun tasarrufunda olan vakıf menzil ve bir tarafdan ba‘zen Ramazan ve ba‘zen Hüseyin nâm kimesneler tasarruflarında olan vakıf menziller ve bir tarafdan tarîk-i âm ile mahdûd fevkānî iki bâb oda ve bir sofa ve kenîf ve mağsel ve tahtânî bir bâb harâb oda ve kenîf ve mahtab ve bi’r-i mâ ve bir mikdâr bahçeyi müştemil mülk menzil bâlâda zikr u beyân olduğu üzere müteveffâ-yı evvel-i mezbûr Terzi el-Hâc Mehmed b. Abdülmennân b. Abdullah’ın ile’l-vefât yedinde mülkü ve hakkı olup ba‘de vefâtihî tashîh-i mezbûr üzere verese-i mezkûresine mevrûs olmuşdur biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle menzil-i mahdûd-ı mezkûrun tashîh-i merkūm üzere on iki sehimden sekiz sehm-i şâyi‘i müteveffâ-yı sânî-i mezbûr el-Hâc Lütfullah Efendi’nin verese-i mezkûresine teslîme mezbûr Berber Ahmed Çelebi’ye tenbîh birle mâ-hüve’l-vâkı‘ bi’l-ibtigā ketb olundu. Fi’l-yevmi’s-sâmin min-Recebi’l-ferd li-sene 1137. Şuhûdü’l-hâl: İmâm Mehmed Efendi b. Feyzullah, İmâm Ahmed Efendi b. Mustafa, Müezzin Hüseyin Çelebi b. Mustafa, el-Hâc Mehmed b. Halil, el-Hâc Mahmud b. İbrahim, Mustafa Yazıcı b. İbrahim, Hasan Çelebi b. İbrahim, İbrahim Çelebi b. Mustafa, el-Hâc Mustafa b. Yusuf, Ahmed Çelebi b. Abbas, Mustafa Çelebi b. Mahmud, Mehmed Çelebi b. İsmail, Süleyman Çelebi b. Mehmed, es-Seyyid Mahmud b. Ali, Mehmed Çelebi b. Abdullah, Berber Mehmed Çelebi b. Abdullah, Hüseyin Çelebi b. Mustafa, Süleyman Çelebi b. Ali, İsmail Çelebi b. İbrahim. İbrahim b. Muharrem.