Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 122 Hüküm no: 89 Orijinal metin no: [12a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tokatlı Hasan Beşe’nin Şerife Fatıma bt. es-Seyyid Hüseyin’den boşandığının anlaşıldığı El-emru hasbemâ yahvîhi nemakahu’l-fakīr ileyhi azze şânuhû el-Hâc Mustafa el-Kādî bi-medîne-i Galata -gufira leh-. Dergâh-ı âlî mahfûfen bi’l-me‘âlî yeniçerilerinden Tokatlı Hasan Beşe b. Yusuf nâm kimesne mahmiye-i İstanbul’da dîvân-ı hazret-i sadr-ı a‘zamîde ma‘kūd meclis-i şer‘de işbu râfi‘atü’l-vesîka Şerife Fâtıma bt. es-Seyyid Hüseyin nâm hâtun mahzarında üzerine da‘vâ ve takrîr-i kelâm edip mezbûre Şerife Fâtıma Hâtun târih-i kitâbdan dört sene mukaddem vilâyet-i Rumeli’nde Niğbolu kasabasında sekiz bin akçe mehr-i mü’eccel ile nefsini bana tezvîc ve ben dahi tezevvüc ve kabûl eylediğim cihetle zevce-i menkûham olmuş iken hâlâ bana nefsini temkîn suâl olunup nefsini temkîne tenbîh olunmak matlûbumdur dedikde gıbbe’s-suâl mezbûre Şerife Fâtıma Hâtun cevâbında fi’l-vâki‘ müdde‘î-i mezbûr Hasan Beşe ber-vech-i muharrer mukaddemâ zevci olduğunu ikrâr lâkin müdde‘î-i mezbûr ile târih-i kitâbdan üç sene mukaddem sâbıku’z-zikr Niğbolu kasabasında yeniçeri ağası olan Hasan Ağa huzûrunda ben sekiz bin akçe mehr-i mü’eccelim ile cihet-i karzdan zimmetinde olan doksan guruş hakkımdan fâriğa olup mezbûr Hasan Beşe’nin zimmetini ibrâ ve ıskāt eylediğimde ol dahi beni talâk-ı selâse ile tatlîk eylemişdir deyü def‘le mukābele edicek gıbbe’l-istintâk ve’l-inkâr mezbûre Şerife Fâtıma Hâtun’dan def‘-i mezbûruna mübeyyine beyyine taleb olundukda udûl-i ahrâr-ı ricâl-i Müslimînden mezbûr Hasan Ağa’nın etbâ‘ından olup İstanbul’da Simkeş mahallesinde sâkin <> Mehmed Çelebi b. Mahmud ve Sarıgörez mahallesinde Ali Ağa menzilinde sâkin Molla Hasan b. el-Hâc Mustafa nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ işbu müdde‘î-i mezbûr Hasan Beşe ber-vech-i muharrer târih-i kitâbdan üç sene mukaddem Niğbolu kasabasında ve yeniçeri ağası olan Hasan Ağa huzûrunda biz hâzırân bi’l-meclis olduğumuz hâlde mezbûre Şerife Fâtıma Hâtun sekiz bin akçe mehr-i mü’ecceli ile mezbûr Hasan Beşe zimmetinde karzdan olan doksan guruş hakkından fâriğa olup mezbûr Hasan Beşe’nin zimmetini ibrâ eyledikde mezbûr Hasan Beşe dahi zevcesi işbu mezbûre Şerife Fâtıma Hâtun’u yine huzûrumuzda talâk-ı selâse ile tatlîk edip bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde ba‘de‘t-ta‘dîl ve’t-tezkiye şehâdetleri makbûle olmağın mûcebiyle müdde‘î-i mezbûr bilâ vech-i şer‘î mezbûre Şerife Fâtıma Hâtun’a mu‘âraza ve müdâhaleden men‘ birle mâ-hüve’l-vâkı‘ bi’l-ibtigā ketb olundu. Fi’l-yevmi’s-sâlis ve’l-ışrîn min-Recebi’l-ferd li-sene seb‘a ve selâsîn ve mi’e ve elf. Şuhûdü’l-hâl: es-Seyyid Ali Ağa b. Hüseyin, Hasan Beşe b. Murad, İbrahim Beşe b. Abdullah, Mehmed Beşe b. Eyüb, İsmail Beşe b. Mehmed, Abdullah b. Mehmed, İbrahim b. Muharrem, Halil b. Mustafa, İbrahim b. Mustafa, Mustafa b. Ahmed, es-Seyyid Mehmed Çavuş b. es-Seyyid Mustafa, es-Seyyid Ca‘fer b. es-Seyyid Ali.