Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 123 Hüküm no: 90 Orijinal metin no: [12b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullâh bt. Kadri’nin menzilini Berber Ahmed Çelebi b. Mehmed ile Ayşe bt. el-Hâc Mehmed’e sattığı Mahrûse-i Galata muzâfâtından kasaba-i Tophane’de Ekmekçibaşı mahallesinde sâkine zâtı Berber Mehmed Çelebi b. Abdullah ve el-Hâc Mustafa b. Yusuf nâm kimesneler ta‘rîfleriyle mu‘arrefe olan Emetullâh bt. Kadri el-Hâc Mehmed nâm hâtun meclis-i şer‘de ikrâr-ı âti’z-zikri tasdîka kendi tarafından asîl ve zevcesi Âişe bt. el-Hâc Mehmed b. Abdullah nâm hâtun tarafından sâbitü’l-vekâle vekîli olan dâmâdı işbu râfi‘u’l-kitâb Berber Ahmed Çelebi b. Mehmed nâm kimesne mahzarında bi-tav‘ihâ ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik olup mahalle-i mezbûrede vâki‘ bir tarafdan Arabzâde mülkü ve bir tarafdan Hadice Hâtun tasarrufunda olan vakıf menzil ve bir tarafdan ba‘zen Ramazan ve ba‘zen Hüseyin nâm kimesneler tasarrufunda olan vakıf menzil ve bir tarafdan tarîk-i âm ile mahdûd fevkānî iki bâb oda ve bir sofa ve mağsel ve kenîf ve tahtânî bir bâb harâb oda ve kenîf ve mahtab ve bi’r-i mâ ve bir mikdâr bahçeyi müştemil mülk menzilimi bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile zevcân-ı mezbûr Berber Ahmed Çelebi ve Âişe Hâtun’a ale’l-iştirâki’s-seviy iki yüz guruşa bey‘ u temlîk ve teslîm eylediğimde onlar dahi ber-vech-i muharrer iştirâ ve tesellüm ve kabûl eylediklerinden sonra menzil-i mahdûd-ı mezbûrun aynına ve semenine ve gabn-ı tağrîrine müte‘allika âmme-i da‘vâdan zevcân-ı mezbûrân Berber Ahmed ve Âişe Hâtun zimmetlerini ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm menzil-i mahdûd-ı mezkûr bi-cemî‘i mâ yeştemilühû ve yahvîhi zevcân-ı mezbûrân Berber Ahmed Çelebi ve Âişe Hâtun’un ale’l-iştirâki’s-seviy mülk-i müşterâları olmuşdur keyfemâ yeşâân ve yahtârân mutasarrıf olsunlar dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-ışrîn min-Recebi’l-ferd li-sene 1137. Şuhûdü’l-hâl: İmâm Mehmed Efendi b. Feyzullah, İmâm Ahmed Efendi b. Mustafa, Müezzin Hüseyin Çelebi b. Mustafa, el-Hâc Mehmed b. Halil, el-Hâc Mahmud b. İbrahim, Mustafa Yazıcı b. İbrahim, Hasan Çelebi b. İbrahim, İbrahim Çelebi b. Mustafa, el-Hâc Mustafa b. Yusuf, Mehmed b. Abdullah, Ahmed Bey b. Abbas, Berber Mehmed Çelebi b. Abdullah, Mehmed Çelebi b. İsmail, Süleyman Çelebi b. Mehmed, İsmail b. İbrahim, es-Seyyid el-Hâc Mehmed b. Ali.