Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 124 Hüküm no: 91 Orijinal metin no: [12b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha bt. Mehmed’in boşandığı kocası es-Seyyid İbrahim b. Bedreddin’den alacaklarını taksitlendirdiği Mahrûse-i Galata’da Alacamescid mahallesinde sâkine Saliha bt. Mehmed nâm hâtun zâtı ba‘de’t-ta‘rîfi’ş-şer‘î mahfil-i şer‘de zevc-i mutallıkı işbu râfi‘u’l-vesîka es-Seyyid İbrahim b. Bedreddin nâm kimesne mahzarında ikrâr ve takrîr-i kelâm edip mezbûr es-Seyyid İbrahim zevcim olmağla târih-i kitâb günü beni bâyinen tatlîk eyledikden sonra zimmetinde mutakarrır ve ma‘kūdün-aleyh olan bin iki yüz akçe mehr-i mü’eccel ile nafaka-i iddet ve me’ûnet-i süknâm için bi’t-terâzî ta‘yîn olunan üç yüz akçe ki cem‘an bin beş yüz akçe hakkımı bana def‘aten edâya iktidârı olmayıp vech-i âtî üzere taksîte tâlib ve ragıb olmağın ben dahi mezbûr es-Seyyid İbrahim’i her otuz günde bana yüzer akçe vermek üzere meblağ-ı mezbûr bin beş yüz akçe hakkımı târih-i kitâbdan on beş ay tamâmına değin te’cîl ve taksît eylediğimde ol dahi ber-vech-i muharrer taksît-i merkūmu kabûl ve meblağ-ı mukassat-ı mezbûru edâya ta‘ahhüd eyledi dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’r-râbi‘ ve’l-ışrîn min-Recebi’l-ferd li-sene 1137. Şuhûdü’l-hâl: İbrahim Ağa b. el-Hâc Bekir, el-Hâc Mehmed b. Ali el-imâm, İbrahim b. el-Hâc Ahmed, İbrahim b. Ömer, Ali b. Ca‘fer Subaşı, es-Seyyid Mehmed b. Mustafa, Mustafa b. Receb.