Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 125 Hüküm no: 92 Orijinal metin no: [12b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Lütfullah Efendi’nin varislerinin menzil hisselerini Emetullâh Hatun’a sattıkları Mahrûse-i Galata muzâfâtından kasaba-i Tophane’de Ekmekçibaşı mahallesinde sâkin iken bundan akdem vefât eden Terzi el-Hâc Mehmed b. Abdülmennân b. Abdullah’ın verâseti sulbî kebîr oğlu el-Hâc Lütfullah Efendi ile sulbiye kebîre kızı Emetullâh Hâtun’a münhasıra olup kable’l-kısme mezbûr el-Hâc Lütfullah Efendi dahi vefât edip verâseti zevce-i menkûhası diğer Emetullâh bt. Mehmed nâm hâtun ile sulbî kebîr oğlu Mehmed’e ve sulbiye kebîre kızları Fâtıma ve Ümmügülsüm ve Zeyneb ve Rabia ve Havva’ya münhasıra ve tashîh-i meseleleri bi-hükmi’l-münâsahati’ş-şer‘iyye on iki sehimden i‘tibâr olunup sihâm-ı mezbûreden dört sehmi mezbûre Emetullâh Hâtun’a ve bir sehmi diğer Emetullâh Hâtun’a ve iki sehmi mezbûr Mehmed’e ve birer sehmi mezbûrât Fâtıma ve Ümmügülsüm ve Zeyneb ve Rabia ve Havva nâm hâtunlardan her birine isâbet eylediği lede’ş-şer‘i’l-enver zâhir ve mukarrer oldukdan sonra mezbûr Mehmed ile mezbûrât diğer Emetullâh Hâtun’u ve Fâtıma ve Ümmügülsüm ve Zeyneb ve Rabia ve Havva taraflarından bey‘-i âti’z-zikri ikrâra vekîlleri olduğu mezbûrât diğer Emetullâh ve Fâtıma ve Ümmügülsüm ve Zeyneb ve Rabia ve Havva’nın zâtlarını ma‘rifet-i şer‘iyye ile ârifân İbrahim Beşe b. Ali ve Süleyman Çelebi b. Mehmed nâm kimesne şehâdetleriyle mahzar-ı hasm-ı câhidde sâbit ve vekâletine hükm-i şer‘î lâhik olan Salih Çelebi b. Mehmed nâm kimesne meclis-i şer‘de işbu râfi‘u’l-vesîka mezbûre Emetullâh Hâtun mahzarında bi’l-vekâle ikrâr ve takrîr-i kelâm edip müteveffâ-yı evvel-i mezbûr Terzi el-Hâc Mehmed’in ile’l-vefât yedinde mülkü olup ba‘de vefâtihî verese-i mezkûresine mevrûs olan mahalle-i mezbûrede vâki‘ bir tarafdan Arabzâde mülkü ve bir tarafdan Hadice Hâtun tasarrufunda olan vakıf menzil ve bir tarafdan ba‘zen Ramazan ve Hüseyin nâm kimesneler tasarruflarında olan vakıf menziller ve bir tarafdan tarîk-i âm ile mahdûd iki bâb oda ve bir sofa ve kenîf ve mağsel ve tahtânî bir bâb harâb oda ve kenîf ve mahtab ve bi’r-i mâ ve bir mikdâr bahçeyi müştemil mülk menzilin tashîh-i mezbûr üzere on iki sehimden cem‘an sekiz sehm hisse-i şâyi‘ası müvekkilât-ı mezbûrât Mehmed ve diğer Emetullâh ve Ümmügülsüm ve Zeyneb ve Rabia ve Havva nâm hâtunlara mevrûs olmağın müvekkilât-ı mezbûrât dahi mikdâr-ı mezkûr hisse-i şâyi‘a-i mezkûrelerini bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûre Emetullâh Hâtun’a cem‘an yüz yirmi beş guruşa bey‘ u temlîk ve teslîm eylediklerinden ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yüz yirmi beş guruşu müvekkillerim mezbûrûn Mehmed ve diğer Emetullâh ve Fâtıma ve Ümmügülsüm ve Zeyneb ve Râbia ve Havva bi-kadri’l-hısas mezbûre Emetullâh Hâtun yedinden ahz u kabz eylediler ba‘de’l-yevm menzil-i mahdûd-ı mezkûrun mecmû‘u bi-cümletin mâ yeştemilehû ve yahvîhi irsen ve şirâen Emetullâh Hâtun’un mülkü olmuşdur keyfemâ teşâ ve tahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’t-tâsi‘ aşer min-şehr-i Recebi’l-ferd li-sene 1137. Şuhûdü’l-hâl: İmâm Mehmed Efendi b. Feyzullah, İmân Ahmed Efendi b. Mustafa, Müezzin Hüseyin Çelebi b. Hüseyin, el-Hâc Mehmed b. Halil, el-Hâc Mehmed b. İbrahim, Mustafa Yazıcı b. İbrahim, Hüseyin Çelebi [b.] İbrahim, İbrahim Çelebi b. Mustafa, Mehmed Çelebi b. İsmail, Süleyman Çelebi b. Ali, Süleyman Çelebi b. Mehmed, İsmail b. İbrahim, el-Hâc Mustafa b. Yusuf, Mehmed Çelebi b. Abdullah, Ahmed Çelebi b. Abbas, Berber Mehmed Çelebi b. Abdullah, Mustafa Çelebi b. Mahmud.