Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 127 Hüküm no: 94 Orijinal metin no: [13a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Babası el-Hâc İsmail b. Bekir’in vekili olan Ali Çelebi’nin borçlu olan el-Hâc Eyüb b. Osman’dan alacağını talep etmesi Hâlâ vilâyet-i Anadolu’da Larende kasabasında Fenari mahallesinde sâkin el-Hâc İsmail b. Bekir b. el-Hâc Süleyman nâm kimesne tarafından vech-i âtî üzere vekâlet iddi‘â eden kebîr oğlu es-Seyyid Ali Çelebi nâm kimesne meclis-i şer‘de mahrûse-i Galata hâricinde Müeyyedzâde mahallesinde sâkin el-Hâc Eyüb b. Osman nâm kimesne mahzarında üzerine da‘vâ ve takrîr-i kelâm edip babam müvekkil-i mezbûr el-Hâc İsmail târih-i kitâbdan on sekiz sene mukaddem mezbûr el-Hâc Eyüb’e alâ-tarîki’l-emâne bin iki yüz guruş îdâ‘ ve teslîm etmeğle babam mezbûr el-Hâc İsmail meblağ-ı mezbûru mezbûr el-Hâc Eyüb’den taleb ve da‘vâ ve ahz u kabza ve kendüye îsâle ve lede’l-iktizâ sulh ve ibrâya ve umûr-ı mezkûre mütevakkıfe olduğu husûsların küllîsine tarafından beni vekîl ve nâib-i menâb nasb ve ta‘yîn eyledikde ben dahi ber-vech-i muharrer ba‘de kabûli’l-vekâle meblağ-ı mezbûru mezbûr el-Hâc Eyüb’den taleb ve da‘vâ eylediğimde mezbûr el-Hâc Eyüb dahi müvekkil-i mezbûr el-Hâc İsmail’in bana îdâ‘ eylediği meblağ-ı mezbûr bin iki yüz guruş on sekiz sene mukaddem Galata Gümrüğü kurbünde vâki‘ mahzenimde hıfz üzere iken bilâ-te‘add[î] zâyi‘ olmuş idi deyü def‘a tasaddî edip ve mezbûr el-Hâc Eyüb husûs-ı mezbûrda emîn olup yemîni ile tasdîk olunur makūlesinden olmağla mezbûr el-Hâc Eyüb’ü tahlîf sadedinde olduğum ecilden beynimizde münâza‘ât-ı kesîre cereyânından sonra beynimize muslihûn tavassut edip beni da‘vâ-yı mezkûremden mezbûr el-Hâc Eyüb ile fedâen li’l-yemîn yüz elli guruş üzerine inşâ-i akd-i sulh eylediklerinde ben dahi ber-vech-i muharrer sulh-i mezbûru mezbûr el-Hâc Eyüb’den taleb eylediğimde teslîmden imtinâ‘ eder suâl olunup teslîme tenbîh olunmak matlûbumdur dedikde gıbbe’s-suâl mezbûr el-Hâc Eyüb cevâbında fi’l-vâki‘ hâl bi’l-cümle müdde‘î-i mezbûrun bâlâda takrîr eylediği minvâl üzere olduğunu ikrâr lâkin müdde‘î-i mezbûr es-Seyyid Ali’nin babası mezbûr el-Hâc İsmail tarafından ber-vech-i muharrer vekâletini inkâr edicek müdde‘î-i mezbûr es-Seyyid Ali Çelebi’den müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden zikr olunan Larende kasabası ahâlîsinden olup mahmiye-i İstanbul’da Kebeciler Hânı’nda tüccâr vechi üzere sâkinler olan es-Seyyid İbrahim Çelebi b. Ahmed ve Ali Çelebi b. Mustafa nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ hâlâ Larende kasabasında Fenari mahallesinde sâkin el-Hâc İsmail b. Bekir b. el-Hâc Süleyman ber-vech-i meşrûh işbu mezbûr el-Hâc Eyüb’e mukaddemâ îdâ‘ ve teslîm eylediği meblağ-ı mezbûr bin iki yüz guruşu mezbûr el-Hâc Eyüb’den taleb ve da‘vâ ve ahz u kabza ve kendüye îsâle lede’l-iktizâ sulh ve ibrâya ve umûr-ı mezkûra mütevakkıfa olduğu husûsların küllîsine işbu kebîr oğlu müdde‘î-i mezbûr es-Seyyid Ali Çelebi’yi bizim huzûrumuzda vekîl ve nâib-i menâb nasb ve ta‘yîn eyledikde ol dahi ber-vech-i muharrer vekâlet-i mezbûreyi kabûl eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm ve’t-tenbîh vekîl-i mezbûr es-Seyyid Ali Çelebi meclis-i mezbûrda işbu râfi‘u’l-kitâb mezbûr Eyüb mahzarında i‘âde-i kelâm edip ânifen edâsına tenbîh-i şer‘î lâhik olan bedel-i sulh-i mezbûr yüz elli guruşu mezbûr el-Hâc Eyüb yedinden bi’t-tamâm ahz u kabz eyledim dedikde gıbbe’t-tasdîki’ş-şer‘î mâ-vaka‘a bi’l-ibtigā ketb olundu. Fi’l-yevmi’l-hâmis ve’l-ışrîn min-Recebi’l-ferd li-sene seb‘a ve selâsîn ve mi’e ve elf. Şuhûdü’l-hâl: es-Seyyid el-Hâc Abdullah b. es-Seyyid el-Hâc Süleyman, Bağcı el-Hâc İbrahim, el-Hâc Ali b. Süleyman, Veli Çelebi b. Süleyman, Mustafa Beşe b. Ali, el-Hâc Mustafa b. Abdullah Burma, Mustafa Beşe b. Ahmed, Veli Beşe b. Ali, Ali Çelebi b. Muharrem Efendi, İsmail Çelebi b. el-Hâc Mehmed.