Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 128 Hüküm no: 95 Orijinal metin no: [13a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mustafa’nın el-Hâc İbrahim b. Mehmed’den talak-ı selase ile boşandığı Mahrûse-i Galata’da Câmi‘-i Kebîr mahallesinde sâkine Âişe bt. Mustafa nâm hâtun zâtı ba‘de’t-ta‘rîfi’ş-şer‘î mahfil-i şer‘de zevc-i mutallıkı işbu râfi‘u’l-kitâb el-Hâc İbrahim b. Mehmed nâm kimesne mahzarında bi-tav‘ihâ ikrâr ve takrîr-i kelâm edip mezbûr el-Hâc İbrahim târih-i kitâbdan bir gün mukaddem beni talâk-ı selâse [ile] tatlîk etmeğle zimmetinde mütekarrır ve ma‘kūdün-aleyh olan on guruş mehr-i mü’eccelim ile nafaka-i iddet ve me’ûnet-i süknâm için bi’t-terâzî ta‘yîn olunan beş guruş ki cem‘an on beş guruşu mezbûr el-Hâc İbrahim Bey def‘ u teslîm eyledikde ben dahi yedinden ahz u kabz eylediğimden sonra hukūk-ı zevciyyete müte‘allika da‘vâdan her birimiz âharın zimmetini ibrâ ve ıskāt eyledik dediklerinde gıbbe’t-tasdîki’ş-şer‘î mâ hüve’l-vâki bi’l-ibtigā ketb olundu. Fî-gurre-i Şa‘bâni’l-mu‘azzam sene 1137. Şuhûdü’l-hâl: es-Seyyid Ali Ağa b. Hasan, el-Hâc Mehmed b. Ahmed, İbrahim Çelebi b. Ömer, İsmail Çelebi b. Ali, Ahmed Çelebi b. Mustafa, Mustafa Beşe b. Osman, es-Seyyid Mustafa Çelebi b. es-Seyyid Mehmed Kayyum, Mustafa Çelebi b. Halil.