Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 128 Hüküm no: 96 Orijinal metin no: [13a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc İbrahim’in küçük oğlu Mehmed’e nafaka ödeyeceği Mahrûse-i Galata[‘da] Câmi‘-i Kebîr mahallesinde sâkine râfi‘atü’l-vesîka Âişe bt. Mustafa nâm hâtun meclis-i şer‘de zevc-i sâbıkı el-Hâc İbrahim b. Mehmed nâm kimesne mahzarında ikrâr ve takrîr-i kelâm edip mezbûr el-Hâc İbrahim’in firâşından hâsıl ve benden mütevellid bi-hakkı’l-hıdâne hacr ve terbiyemde olan sagīr oğlu Mehmed’in nafaka ve kisve bahâya eşedd-i ihtiyâcı olmağla babası mezbûr el-Hâc İbrahim üzerine cânib-i şer‘den kadr-i kifâye meblağ farz ve takdîr olunmak matlûbumdur dedikde hâkim-i muvakkı‘ a‘le’l-kitâb -rafa‘-a kadruhû mevlâhü’l-vahhâb- efendi hazretleri tarafeynin rızâ ve ittifâklarıyla sagīr-i mezbûr Mehmed’in nafaka ve kisve vesâir levâzım-ı zarûriyyesiʼçün babası mezbûr el-Hâc İbrahim üzerine târih-i kitâbdan yevmî sekizer akçe farz ve takdîr edip meblağ-ı mefrûz-ı mezkûru sagīr-i mezbûr Mehmed’in nafaka ve kisve ve levâzım-ı zarûriyyesine harc ve sarfa ve lede’l-iktizâ istidâneye ve inde’z-zafer babası mezbûr el-Hâc İbrahim üzerine rücû‘a mezbûr Âişe Hâtun’a izin verilmeğin mâ-hüve’l-vâkı‘ bi’l-ibtigā ketb olundu. Fî-gurre-i Şa‘bâni’l-mu‘azzam sene 1137. Şuhûdü’l-hâl: es-Sâbikūn.