Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 129 Hüküm no: 98 Orijinal metin no: [13a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Çelebi’nin küçük oğlu Ahmed’e nafaka ödeyeceği Mahrûse-i Galata hâricinde Bedreddin Bey mahallesinde sâkine işbu râfi‘atü’l-vesîka Hadice bt. Halil nâm hâtun zâtı ba‘de’t-ta‘rîfi’ş-şer‘î mahfil-i şer‘de zevc-i muhâlı‘ı Süleyman Çelebi b. el-Hâc Ahmed mahzarında takrîr-i kelâm ve ta‘bîr ani’l-merâm mezbûr Süleyman Çelebi’nin firâşından hâsıl ve benden mütevellid bi-hakkı’l-hıdâne hacr ve terbiyemde olan sagīr oğlu Ahmed’in nafaka ve kisve bahâya ihtiyâcı olmağla sagīr-i mezbûrun nafaka ve kisve ve levâzım-ı zarûriyyesiʼçün babası mezbûr Süleyman Çelebi üzerine mikdâr-ı kifâye meblağ farz ve takdîr olunmak matlûbumdur dedikde hâkim-i muvakkı‘-ı a‘le’l-kitâb tûbâ-lehû ve hüsnü-meâb efendi hazretleri tarafından rızâlarıyla târih-i kitâbdan babası mezbûr Süleyman üzerine yevmî dörder akçe farz ve takdîr edip meblağ-ı mefrûz-ı mezkûru sagīr-i mezbûr Ahmed’in nafaka ve kisve ve levâzım-ı zarûriyyesine harc ve sarfa ve lede’l-iktizâ istidâneye ve ınde’z-zafer babası mezbûr [13b] Süleyman Çelebi üzerine rücû‘a mezbûre Hadice Hâtun’a izin vermeğin mâ-hüve’l-vâkı‘ li-ecli’s-sened bi’l-ibtigā ketb olundu. Fi’l-yevmi’s-sâdis min-Şa‘bâni’l-mu‘azzam sene 1137. Şuhûdü’l-hâl: Halil Ağa b. Mustafa, el-Hâc Hasan b. Süleyman, Halil Çelebi b. Mustafa, İbrahim Çelebi b. Mustafa, Mustafa b. Ahmed, Mehmed b. Ahmed.