Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 130 Hüküm no: 99 Orijinal metin no: [13b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bogos v. Kirkor’un menzil hissesini Kirkor v. Isador’a sattığı Mahrûse-i Galata’da Bereketzâde mahallesinde mütemekkin Bogos v. Kirkor nâm Ermeni meclis-i şer‘de işbu hâmilü’r-rakīm Kirkor v. Isador nâm Ermeni muvâcehesinde ikrâr ve takrîr-i kelâm edip mahalle-i mezbûrede vâki‘ bir tarafdan Fidan nâm Ermeni menzili ve bir tarafdan Timur Dayı nâm Ermeni menzili ve taraf-ı sâlisden ba‘zen merkūm Fidan bahçesi ve ba‘zen Bayar nâm Ermeni menzili ve taraf-ı râbi‘den tarîk-i âm ile mahdûd tabaka-i ulyâda bir bâb oda ve iki sofa ve matbahı ve fevkinde cihân-nümâyı ve vüstâda iki bâb oda ve matbahı ve süflâda iki mahtab ve sahrınc ve bi’r-i ma ve kenîf ve bir mikdâr havluyu müştemil mülk menzilin kırk sekiz sehimden otuz sekiz sehm-i şâyi‘i irsen ve şirâen benim ve on sehm-i şâyi‘i karındaşım Sahak nâm Ermeni’nin mülkümüz olmağla hâlâ ben menzil-i mahdûd-ı mezbûrda olan otuz sekiz sehm hisse-i şâyi‘a-i şer‘iyyemi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Kirkor’a sekiz yüz yetmiş guruş ile mechûlü’l-aded bir kabza fülûsa bey‘ u teslîm edip ol dahi ber-vech-i muharrer iştirâ ve tesellüm ve kabûl eyledikden sonra semen-i merkūm sekiz yüz yetmiş guruş ile mechûlü’l-aded bir kabza fülûsu müşterî-i merkūm yedinden tamâmen alıp kabz eyleyip ve zikr olunan mechûlü’l-aded bir kabza fülûsu işbu meclisde saçıp izâ‘at ve itlâf eyledim fîmâ ba‘d menzil-i mahdûd-ı mezbûrun otuz sekiz sehm hisse-i şâyi‘i mezbûr Kirkor’un mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-hâmis min-Şa‘bâni’l-mu‘azzam sene 1137. Şuhûdü’l-hâl: Serbölük Halil Ağa, Mustafa b. Receb, Süleyman b. Ahmed, Çukadâr el-Hâc Mehmed, Abdullah Çelebi b. Mehmed Çukadâr, Aşcı el-Hâc Mehmed, Mehmed b. Ahmed Bursalı, Papa Matos v. Aznavur.