Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 131 Hüküm no: 100 Orijinal metin no: [13b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. es-Seyyid el-Hâc Mehmed b. es-Seyyid Cafer’in terekesinin intikalinin es-Seyyid Cafer b. es-Seyyid Hasan’ın beyanına uygun olduğu Mahrûse-i Galata hâricinde Fındıklı kasabasında vâki‘ Molla Çelebi mahallesinde sâkin iken bundan akdem vefât eden es-Seyyid el-Hâc Mehmed b. es-Seyyid Ca‘fer’in verâseti zevce-i metrûkesi Şerife Fâtıma bt. es-Seyyid el-Hâc Hasan ile sulbî evlâdı es-Seyyid el-Hâc Hasan ve es-Seyyid Osman ve Şerife Havva ve Şerife Âişe’ye münhasıra olup kable’l-kısme mezbûr es-Seyyid Ahmed dahi vefât edip verâseti anası mezbûre Şerife Fâtıma ile li-ebeveyn karındaşları merkūmûn el-Hâc Hasan ve Şerife Havva ve Şerife Âişe’ye münhasıra olup kable’l-kısme mezbûre Şerife Havva dahi müteveffiye olmağla verâseti zevc-i metrûku es-Seyyid Ca‘fer b. es-Seyyid Hasan ile anası mezbûre Şerife Fâtıma’ya ve sagīre kızları Şerife Afife ve Şerife Nefise’ye münhasıra olup kable’l-kısme mezbûre Şerife Fâtıma dahi müteveffiye olmağla verâseti kebîr oğlu mezbûr es-Seyyid el-Hâc Hasan ve kebîre kızı mezbûre Şerife Âişe’ye münhasıra ve tashîh-i meseleleri bi-hükmi’l-münâsahati’ş-şer‘iyye altmış yedi bin üç yüz doksan iki sehimden i‘tibâr olunup sihâm-ı merkūmeden otuz yedi bin beş yüz elli sehmi mezbûr es-Seyyid el-Hâc Hasan’a 18775 ve ( ) sehmi mezbûre Şerife Âişe’ye 6783 ve ( ) sehmi mezbûr es-Seyyid Ca‘fer’e 4384 ve ( ) sehmi sagīre-i mezbûre Şerife Afife’ye isâbeti tahakkukundan sonra mezbûr es-Seyyid Ca‘fer kendi kıbelinden asâleten ve kızı sagīre-i merkūme Şerife Afife’nin tesviye-i umûrunu rü’yete vasiyy-i mansûbe olmağla vesayeten meclis-i şer‘de işbu râfi‘u’l-vesîka mezbûr es-Seyyid el-Hâc Hasan ile mezbûre Şerife Âişe’nin zevci ve tarafından ikrâr-ı câi’z-zikri tasdîke vekîl-i sâbitü’l-vekâlesi Abdullah Çelebi b. Muharrem mahzarında bi’l-asâle ve bi’l-vesaye ikrâr ve takrîr-i kelâm edip müteveffâ-yı evvel-i mezbûr es-Seyyid el-Hâc Mehmed’in terekesinden olup mahalle-i merkūmede vâki‘ bir tarafdan merhûm el-Hâc Mahmud Efendi veresesi mülkü ve bir tarafdan es-Seyyid el-Hâc Abdullah mülkü ve bir tarafdan Hadice Hâtun mülkü ve bir tarafdan tarîk-i âm ile mahdûd müştemilât-ı ma‘lûmeyi muhtevî mülk menzil ve Ortaköy kasabasında vâki‘ arsası vakıf ve üzerinde mevcûde ebniyesi mülk olan bir tarafdan Haham Yovad menzili ve bir tarafdan Yakov Teryano nâm Yahûdiler menzilleri ve bir tarafdan Libağna nâm Yahûdiye menzili ve bir tarafdan tarîk-i âm ile mahdûd ulyâda iki bâb oda ve dehlîz vüstâda iki bâb oda ve dehlîz ve süflâda iki bâb dükkânı müştemil Yahûdi hânenin tashîh-i merkūm üzere 67392 sehimden 2783 sehmi bana ve 4284 sehmi kızım sagīre-i merkūme Şerife Afife’ye ve 37550 sehmi mezbûr el-Hâc Hasan’a ve 18775 sehmi müvekkile-i merkūme Şerife Âişe Hâtun’a mevrûs olmağın mezbûrân el-Hâc Hasan ve Abdullah Çelebi’den suâl [olunup] takrîrleri tahrîr ve kıbel-i şer‘den hüccet-i şer‘iyye tastîr olunması murâdımdır dedikde gıbbe’s-suâl mezbûr el-Hâc Hasan ile vekîl-i mezbûr Abdullah Çelebi cevâblarında fi’l-vâki‘ hâl bi’l-cümle mezbûr es-Seyyid Ca‘fer’in bâlâda tafsîl ve beyân ve zikr u ayân eylediği minvâl-i muharrer üzere olduğu her biri bi’l-asâle ve bi’l-vekâle ikrâr ve i‘tirâf etmeğin işbu sahîfe-i sahîha li-ecli’s-sened ketb olundu. Fi’l-yevmi’s-sâlis ve’l-ışrîn min-Recebi’l-ferd sene 1137. Şuhûdü’l-hâl: es-Seyyid Ali Ağa b. Hasan, es-Seyyid Ca‘fer b. es-Seyyid Ali, İbrahim b. Muharrem, Halil Çelebi b. Mustafa, İbrahim b. Mustafa, Mustafa b. Receb, Mehmed b. Ahmed.