Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 132 Hüküm no: 102 Orijinal metin no: [13b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe b. Abdullah’ın küçük kızı Hadice’ye nafaka ödeyeceği Mahrûse-i Galata’da el-Hâc A‘mâ mahallesinde sâkine zâtı ta‘rîf-i şer‘î ile mu‘arrefe işbu râfi‘atü’l-vesîka Emine bt. Ahmed nâm [hâtun] meclis-i şer‘de zevc-i muhâlı‘ı Ali Beşe b. Abdullah nâm kimesne mahzarında takrîr-i kelâm ve ta‘bîr ani’l-merâm [edip] mezbûr Ali Beşe’nin firâşından hâsıla ve benden mütevellide bi-hakkı’l-hıdâne hacr ve terbiyemde olan sagīre kızım Hadice’nin nafaka ve kisve bahâya eşedd-i ihtiyâcı olmağla babası mezbûr Ali Beşe üzerine kıbel-i şer‘den kadr-i kifâye meblağ farz ve takdîr olunmak murâdımdır dedikde hâkim-i muvakkı‘-ı sadr-ı kitâb tûbâ-lehû ve hüsnü-meâb hazretleri dahi sagīre-i mezbûrenin nafaka ve kisve ve levâzım-ı sâiresiʼçün tarafeynin rızâlarıyla babası mezbûr Ali Beşe üzerine târih-i kitâbdan yevmî birer para farz ve takdîr edip meblağ-ı mefrûz-ı mezkûru sagīre-i mezbûre Hadice’nin nafaka ve kisve ve levâzım-ı sâiresine harc ve sarfa ve lede’l-iktizâ istidâneye ve ınde’z-zafer babası mezbûr Ali Beşe üzerine rücû‘a mezbûre Emine Hâtun’a izin verilmeğin mâ-hüve’l-vâkı‘ bi’l-ibtigā ketb olundu. Fî 10 Receb sene 1137. [Şuhûdü’l-hâl] Hüddâm-ı mahkemedir.