Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 133 Hüküm no: 103 Orijinal metin no: [14a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maryora bt. istafan’ın mülk menzilini Petro Fonton v. Fonton ile Filipo v. Momar’a sattığı Husûs-ı âti’z-zikrin mahallinde ketb ü tahrîri iltimâs olunmağın savb-ı şer‘i’l-enverden mevlânâ Halil Efendi b. Hüseyin me’zûnen bi’l-ketb irsâl olunup ol dahi mahrûse-i Galata hâricinde Kalafatcıbaşı mahallesinde sâkine Maryora nâm Nasrânînin zikri âti mülk menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf-i nebevî eyledikde şahsı Yasakcı İbrahim Beşe b. Mehmed ve Abdullah Beşe b. Mahmud ta‘rîfleriyle mu‘arrefe olan merkūme Maryora bt. İstafan meclis-i ma‘kūd-ı mezbûrda işbu hâmilü’r-rakīm Petro Fonton v. Fonton ile Filipo v. Momar nâm müste’men muvâcehelerinde ikrâr ve takrîr-i kelâm edip akd-i âtî sudûruna değin silk-i mülkümde münselik olup zikr olunan Kalafatcıbaşı mahallesinde vâki‘ bir tarafdan Saatci Dimitraşko mülkü ve bir tarafdan ba‘zen Kasanda Nasrâniye mülkü ve bir tarafdan Maraltiya İstafano Beyafki mülkü ile mahdûd ulyâda dört bâb oda ve bir kilâr ve dehlîz vüstâda dört bâb oda ve bir kilâr ve dehlîz ve kenîf süflâda bir bâb oda ve iki mahzen ve dehlîz ve havlu ve bir mikdâr cüneyne ve tarîk-i hâs ve sokak kapısını müştemil mülk menzilimi cemî‘ tevâbi‘ ve levâhık ve kâffe-i menâfi‘ ve merâfıkıyla tarafeynden îcâb ve kabûlü hâvî bey‘-i bâtt-ı sahîh-i şer‘î ile merkūmân Petro Fonton ve Filipo’ya ale’l-iştirâki’s-seviy sekiz yüz guruş ile mechûlü’l-aded bir kabza fülûsa bey‘ u teslîm eylediğimde onlar dahi ber-vech-i muharrer iştirâken iştirâ ve tesellüm ve kabûl eylediklerinden sonra semeni olan meblağ-ı mezbûr sekiz yüz guruş ile mechûlü’l-aded bir kabza fülûsu müşteriyân-ı merkūmân yedlerinden tamâmen alıp kabz eyleyip ve zikr olunan bir kabza mechûlü’l-aded fülûsu işbu meclis-i şer‘de izâ‘at ve itlâf eylediğimden sonra semen-i merkūma ve menzil-i mahdûd-ı mezbûrun gabn ve tağrîrine müte‘allika âmme-i da‘vâdan merkūmân Petro Fonton ve Filipo’nun zimmetlerini ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm menzil-i mahdûd-ı merkūm bi-cümletin mâ yeştemilühû ve yahvîhu müşteriyân ve merkūmânın ale’l-iştirâki’s-seviy mülk-i müşterâlarıdır keyfemâ yeşâân ve yahtârân mutasarrıf olsunlar dedikde vaki‘ hâli mevlânâ-yı mezkûr mahallinde ketb ü tahrîr ve ma‘an ba‘s olunan Çukadâr Abdullah Beşe b. Mahmud ve muhzır ve Serbölük Halil Çelebi b. Mustafa ile mahfel-i şer‘a gelip alâ-vukū‘ihî inhâ ve takrîr etmeğin mâ-hüve’l-vâkı‘ bi’l-ibtigā ketb olundu. Fî-selh-i Recebi’l-ferd sene 1137. Şuhûdü’l-hâl: Süleyman Çelebi b. Ali, İbrahim b. Ali, es-Seyyid Mehmed b. Osman, Bursalı Mehmed b. Ahmed, Abdullah Beşe b. Mustafa, Mehmed Beşe b. Süleyman, İbrahim Beşe b. Mehmed, Hoce Aslan v. Aleksan, Anderyabon v. Bon, Abram v. Ariton.