Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 134 Hüküm no: 104 Orijinal metin no: [14a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitraşko’nun verasetinin iki sehmi Covani birer sehmi de Zabete ve Ursula’ya isabet ettiği Mahrûse-i Galata hâricinde Kamer Hâtun mahallesinde sâkin Covani v. Dimitraşko mahfil-i şer‘de li-ebeveyn kız karındaşları Zabete ve Ursula taraflarından ikrâr-ı âti’l-beyânı tasdîka vekîlleri olduğu merkūmetânın şahıslarını ma‘rifet-i şer‘iyye ile ârifân Dominiko v. Lorniso ve Çuğala v. Çuğala şehâdetleriyle şer‘an sâbit olan merkūme Zabete’nin zevci olup hâlâ medîne-i İzmir’de Venedik konsolosu olan Can Antoni v. Paçoni muvâcehesinde İngiliz tercümânı olduğu hâlde ikrâr ve takrîr-i kelâm edip babamız olup bundan akdem hâlik olan İngiliz Tercümânı merkūm Dimitraşko’nun terekesinden olup zikr olunan Kamer Hâtun mahallesinde vâki‘ iki tarafdan bizim iştirâken mülkümüz olan İngiliz elçisi sâkin olduğu menzil-i kebîr ve bir tarafdan hamâm arsası ve odalar ve bir tarafdan tarîk-i âm ile mahdûd ulyâda dört bâb oda ve bir matbah ve bir kilâr ve bir sofa ve bir tahta-pûş ve iki kenîf vüstâda dört bâb oda süflâda beş bâb mahzen ve sokak kapısı tarafından fevkānî üç bâb oda ve dehlîz ve tahtânî mahzen ve câmeşûy-hâne ve bi’r-i mâ ve eşcâr-ı müsmire ve gayr-i müsmireli bahçeyi müştemil mülk menzilin dört hissede iki hissesi irsen ve şirâen benim ve birer hissesi kız karındaşlarım müvekkiletân-ı merkūmetân Zabete ve Ursula’dan her birinin ale’l-iştirâk mülkümüz olmağın hâlâ vekîl-i merkūm Can Antoni’den suâl olunup takrîri tastîr ve kıbel-i şer‘den hüccet-i şer‘iyye tahrîr olunması murâdımdır dedikde gıbbe’s-suâl vekîl-i merkūm Can Antoni cevâbında fi’l-vâki‘ menzil-i mahdûd-ı mezbûrun ber-minvâl-i muharrer dört hissede iki hissesi merkūm Covani’nin ve birer hissesi kız karındaşları müvekkiletân-ı merkūmetân Zabete ve Ursula’dan her birinin irsen ve şirâen ale’l-iştirâk mülkleri olduğunu ikrâr ve i‘tirâf etmeğin işbu sahîfe li-ecli’s-sened ketb olunup yedlerine def‘ olundu. Fi’l-yevmi’l-hâmis min-Şa‘bâni’l-mu‘azzam sene 1137. Şuhûdü’l-hâl: Yasakcı Mustafa Beşe, Abdullah Çelebi b. Mahmud, Arusi Mustafa Efendi, Sırmakeş Mustafa, İbrahim b. Muharrem, Halil b. Mustafa, Mustafa b. Ahmed.