Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 135 Hüküm no: 105 Orijinal metin no: [14a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Mustafa’nın vefatıyla boşandığı kocası el-Hâc Mustafa b. Resul’un diğer vârislerin hisselerini satın aldığı Mahrûse-i Galata’da Okcu Musa mahallesinde sâkine iken bundan akdem vefât eden Fâtıma bt. Mustafa b. Sırrı’nın verâseti zevc-i metrûku el-Hâc Mustafa b. Resul nâm kimesne ile li-ebeveyn kız karındaşı Âişe nâm hâtuna ve li-üm er karındaşı İsmail Çelebi b. Ramazan nâm kimesneye münhasıra ve tashîh-i mes’elesi bi-hükmi’l-ferâiz yedi sehimden i‘tibâr olunup sihâm-ı mezbûreden üç sehmi zevci mezbûr el-Hâc Mustafa’ya ve üç sehmi mezbûre Âişe Hâtun’a ve bir sehmi mezbûr İsmail Çelebi’ye isâbet eylediği lede’ş-şer‘i’l-enver zâhir ve mukarrer oldukdan sonra mezbûr İsmail Çelebi asâleten ve mezbûre Âişe Hâtun tarafından ibrâ-yı âti’z-zikri ikrâra vekîli olduğu zât-ı mezbûreyi ma‘rifet-i şer‘iyye ile ârifân Ali Çelebi b. Muharrem Efendi ve el-Hâc Ahmed b. el-Hâc Mehmed nâm kimesneler şehâdetleriyle mahzar-ı hasm-ı câhidde sâbit ve vekâletine hükm-i şer‘î lâhik olan İbrahim Çelebi b. el-Hâc Mustafa b. Abdurrahman nâm kimesne vekâleten meclis-i şer‘de işbu râfi‘u’l-kitâb mezbûr el-Hâc Mustafa mahzarında her biri bi’l-asâle ve bi’l-vekâle ikrâr ve takrîr-i kelâm edip mahalle-i mezbûrede vâki‘ bir tarafdan Uzun Ali mülkü ve bir tarafdan Fâtıma nâm hâtun mülkü ve bir tarafdan Uncu el-Hâc Hasan tasarrufunda olan vakıf menzil ve bir tarafdan tarîk-i âm ile mahdûd fevkānî iki bâb oda ve bir matbah ve dehlîz ve kenîf ve tahtında bir bi’r-i mâ ve kenîf ve bir mikdâr havluyu müştemil mülk menzilin nısf-ı şâyi‘i ile’l-vefât mûrisemiz müteveffât-ı mezbûre Fâtıma Hâtun’un ve nısf-ı şâyi‘-i âharı dahi mezbûr el-Hâc Mustafa’nın ale’l-iştirâki’s-seviy mülkleri olmağla mezbûr el-Hâc Mustafa dahi zevcesi müteveffât-ı mezbûrenin menkūl ve gayr-i menkūl tereke-i mevcûdesinden tashîh-i mezkûr üzere yedi sehimden kendüye isâbet eden üç sehm hisse-i şer‘iyyesi mukābelesinde alâ tarîki’t-tehârüc nısf-ı menzil-i mahdûd-ı mezkûru tarafeynin rızâsıyla ahz u kabz ve müteveffât-ı mezbûrenin tereke-i sâiresine müte‘allika âmme-i da‘vâdan benim ve müvekkilem mezbûre Âişe Hâtun’un zimmetlerimizi ibrâ-i âmm ile ibrâ ve ıskāt etmeğin ben dahi müvekkillerim mezbûr Âişe Hâtun ile mûrisemiz müteveffât-ı mezbûre Fâtıma Hâtun’un kalîl ü kesîr ve celîl ü hakīr bakī kalan terekesini ahz ve beynimizde tevzî‘ ve taksîm ve tashîh-i mezbûr üzere her birimiz mikdâr-ı mezkûr hisse-i irsiyye-i şer‘iyyemizi ahz u kabz eylediğimizden sonra mûrisemiz müteveffât-ı mezbûre Fâtıma Hâtun’un mehr-i mü’ecceline ve terekesine müte‘allika âmme-i da‘vâdan mezbûr el-Hâc Mustafa’nın zimmetini [14b] kezâlik ibrâ-i âmm ile ibrâ ve ıskāt eyledik dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-hâmis min-Şa‘bâni’l-mu‘azzam sene 1137. Şuhûdü’l-hâl: Kasap el-Hâc Mustafa, Mustafa b. Receb, Mehmed b. Ahmed, Molla Mehmed b. Yusuf, Halil b. Mustafa, Uzun Ali Beşe, Şerbetçi Hasan Beşe, Müezzin Molla Ali, Salih Kapudân.