Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 136 Hüküm no: 106 Orijinal metin no: [14b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lagorta bt. Covani’nin İngiliz Sarayı denen menzilindeki hissesini ve eşyalarını çocuklarına sattığı Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘i’l-enverden mevlânâ Halil Efendi b. Hüseyin me’zûnen bi’l-ketb irsâl olunup ol dahi mahrûse-i Galata hâricinde Kamer Hâtun huzûrlarında akd-i meclis-i şer‘-i şerîf-i nebevî eyledikde şahsı Corci v. Anton ve diğer Corci v. Franserko ta‘rîfleriyle mu‘arrefe olan Lagorta bt. Covani nâm nasrâniye meclis-i ma‘kūd-ı mezbûrda işbu hâmilü’r-rakīm kebîr oğlu Covani v. Dimitraşko ve kebîre kızları Zabete ve Ursula bt. Dimitraşko muvâcehelerinde İngiliz Baştercümânı Lokaki hâzır olduğu hâlde bi-tav‘ihâ ikrâr ve takrîr-i kelâm edip akd-i âtî sudûruna değin irsen ve şirâen yedimde mülküm olup zikr olunan Kamer Hâtun mahallesinde vâki‘ bir tarafdan ba‘zen tarîk-i âm ve ba‘zen merkūmûn ile ma‘an sâkine olduğumuz mülk menzil ve ba‘zen hamâm arsası ve etrâf-ı selâseden tarîk-i âm ile mahdûd fevkānî on dört bâb oda ve üç dîvânhâne ve dört dehlîz ve tahtânî sagīr ve kebîr on altı bâb oda ve bir matbah ve bir câmeşûy-hâne ve bir ahur ve fevkinde bir anbar ve bir kenîse ve kapı hizâsında duvara muttasıl fevkānî bir bâb oda ve tahtânî üç bâb yasakcı odaları ve kenîf ve üç bi’r-i mâ ve eşcâr-ı müsmire ve gayr-i müsmireli iki kat bahçe ve etrâf-ı erba‘asında arşın duvarları müştemil olup İngiliz Sarayı demekle ma‘rûf olan mülk menzil-i kebîrimizi cemî‘ tevâbi‘ ve levâhıkı ve kâffe-i hukūk ve merâfıkıyla tarafeynden îcâb ve kabûlü hâvî ve şurût-ı müfsideden ârî bey‘-i bâtt-ı sahîh-i şer‘î ile dört hissede iki hissesini oğlum mezbûr Covani’ye ve birer hissesini kızlarım merkūmetân Zabete ve Ursula’dan her birine iştirâken ( ) cem‘an yedi bin guruşa bey‘ u teslîm ve temlîk eylediğimde onlar dahi ber-vech-i muharrer iştirâ ve tesellüm ve temellük ve kabûl eylediklerinden sonra merkūmûn ile ma‘an sâkine olduğum işbu menzil derûnunda mevcûde olan eşyâ-yı memlûkemden çatma ve katife mahlût 30 aded yasdık ma‘a gılâf ve sagīr ve kebîre 15 minder ve 4 beledi döşek ve 12 müsta‘mel yorgan ve köhne 6 çift mak‘ad ve 4 köhne kaliçe ve 60 vakiyye bakır evânımı ve eşyâ-i sâire-i ma‘lûmelerimi dahi bi-safkatin vâhidetin kezâlik 4 sehimden 2 [sehmini] oğlum merkūm Covani’ye ve birer sehmini kızlarım merkūmetân Ratbe ve Ursula‘dan her birine tarafeynden îcâb ve kabûlü hâvî bey‘-i bâtt-ı sahîh-i şer‘î ile iki yüz guruşa bey‘ u teslîm eylediğimde onlar dahi ber-minvâl-i muharrer iştirâken iştirâ ve tesellüm ve kabûl eylediklerinden sonra menzil-i mahdûd-ı mezbûr ile eşyâ-yı merkūmenin aynlarına ve min-haysü’l-mecmû‘ semenleri olan yedi bin iki yüz guruşa müte‘allika âmme-i de‘âvî ve mutâlebât ve eymân ve muhâsamâtdan merkūmûn Covani ve Zabete ve Ursula’nın zimmetlerini ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm menzil-i mahdûd-ı mezbûr ile eşyâ-i muharrere-i mezbûrenin mecmû‘u evlâdlarım merkūmûn Covani ve Zabete ve Ursula’nın ber-vech-i iştirâk mülk-i müşterâları olmuşdur keyfemâ yeşâûn ve yahtârûn mutasarrıf olsunlar dedikde gıbbe’t-tasdîki’ş-şer‘î vâki‘ hâli mevlânâ-yı mezkûr mahallinde ketb ü tahrîr ve ma‘an ba‘s olunan Çukadâr Abdullah Çelebi b. Mahmud ve Serbölük Halil Çelebi b. Mustafa ile mahfel-i şer‘a gelip alâ-vukū‘ihî inhâ ve takrîr etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’s-sâlis min-Şa‘bâni’l-mu‘azzam sene 1137. Şuhûdü’l-hâl: Molla Süleyman b. İbrahim, Mustafa b. Ahmed, Berber Ahmed Çelebi, Abdullah Çelebi b. Mahmud, Bursalı Mehmed b. Ahmed.