Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 137 Hüküm no: 107 Orijinal metin no: [14b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Mustafa’nın vasiyeti Mahrûse-i Galata a‘mâlinden kasaba-i Tophane’de Karabaş Mustafa Ağa mahallesinde sâkine olup zâtı mahalle-i mezbûre imâmı İsmail Efendi b. eş-Şeyh Hüseyin Efendi ve Berber Molla Hüseyin b. Abdurrahman ta‘rîfleriyle mu‘arrefe olan Fâtıma bt. Mustafa nâm hâtun mahfil-i şer‘de zikri câî vesâyâsını tenfîze vasiyy-i muhtâr nasb ve ta‘yîn eylediği zevci işbu râfi‘u’l-vesîka Mehmed Beşe b. Mustafa mahzarında li-ebeveyn er karındaşı oğlu Yusuf Beşe b. Ahmed hâzır olduğu hâlde ikrâr ve takrîr-i kelâm edip ben bi-emri’llâhi’l-meliki’l-müte‘âl bu dâr-ı fenâdan sarây-ı bekāya intikâl eylediğimde mecmû‘ mâlımın sülüsü ifrâz olunup sülüs-i mezbûrdan iki bin dört yüz akçesi re’y-i Müslimîn üzere techîz ve tekfîn ve bin akçe dahi ıskāt-ı savm u salâtıma harc ve sarf oluna ve fazlasından bir Mushaf-ı şerîf iştirâ ve müstehakkīnden birine verile ve sülüs-i mezkûrdan bâkīsi vücûh-ı berre sarf oluna ve zevcim mezbûrun zimmetinde mütekarrır olan bin akçe mehr-i mü’eccelimi mukaddemâ yedinden ahz u kabz eylediğim ecilden zevcim meblağ-ı mezbûr talebiyle rencîde olunmaya deyü vasiyet ve vesâyâ-yı mezkûresini tenfîze zevci mezbûr Mehmed Beşe’yi vasiyy-i muhtâr nasb ve ihtiyâr eyledikde ol dahi ber-vech-i vesayet mezbûreyi kabûl ve hizmet-i lâzımesini ikāmete ta‘ahhüd etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’s-sâmin min-Şa‘bâni’l-mu‘azzam sene 1137. Şuhûdü’l-hâl: Molla Mustafa Kayyım, Terzi Ahmed Çelebi, Berber Molla Hüseyin, İzmirli Hasan Beşe, Kâhici Musa Beşe, Berber Abdullah b. Osman, Mehmed Reis b. Hüseyin Reis.