Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 137 Hüküm no: 108 Orijinal metin no: [14b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Çelebi b. Hasan’ın eşi Ümmühâni bt. Abdullah’la müşterek menzillerini Mahmud b. Mehmed’e sattıkları Mahrûse-i Galata’da Okcu Musa mahallesi ahâlîsinden olup kendi tarafından asîl ve hâlâ zevcesi mahalle-i mezbûrede sâkine Ümmühâni bt. Abdullah b. Abdülmennân nâm hâtun tarafından bey‘-i âti’z-zikri ikrâra vekîl olduğu zât-ı mezbûreyi ma‘rifet-i şer‘iyye ile ârifân Hasan Çelebi b. Mehmed ve Abdullah Çelebi b. Hüseyin nâm kimesneler şehâdetleriyle sâbit olan Hüseyin Çelebi b. Hasan nâm kimesne meclis-i şer‘de işbu sâhibü’l-kitâb Mahmud b. Mehmed nâm kimesne mahzarında bi’l-asâle ve bi’l-vekâle ikrâr ve takrîr-i kelâm edip akd-i âti’z-zikrin sudûruna değin zevcem müvekkile-i mezbûre Ümmühâni Hâtun ile ale’l-iştirâki’s-seviy silk-i mülkümde münselik olup mahalle-i mezbûrede vâki‘ bir tarafdan Gümrük Katibi İbrahim Efendi bahçesi ve bir tarafdan Haffâf el-Hâc Ahmed menzili ve bir tarafdan mahalle-i mezbûre mescid-i şerîfi vakfı olan menzil ve bir tarafdan tarîk-i âm ile mahdûd fevkānî iki bâb oda ve dehlîz ve tahtânî kenîf ve bi’r-i mâ ve bahçeyi müştemil merhûme Ümmühâni Hâtun Vakfı’na senevî yüz seksen akçe mukāta‘a-i kadîmesi olan mülk menzilimi mezbûr Mahmud’a tarafeynden îcâb ve kabûlü hâvî bey‘-i bâtt-ı sahîh-i şer‘î ile yüz doksan guruşa bey‘ u teslîm eylediğimizde ol dahi ber-vech-i [muharrer] iştirâ ve tesellüm ve kabûl eylediğinden sonra semeni olan meblağ-ı mezbûr yüz doksan guruşu mezbûr Mahmud yedinden tamâmen ahz u kabz eyledik ba‘de’l-yevm menzil-i mahdûd-ı mezkûr bi-cemî‘i mâ yeştemilühû ve yahvîhi mezbûr Mahmud’un mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-hâdî aşer min-Şa‘bâni’l-mu‘azzam sene 1137. Şuhûdü’l-hâl: Mehmed Efendi b. Ali el-imâm, Mehmed Çelebi b. Mustafa, Kürkcü el-Hâc Osman, Mustafa Beşe b. Mehmed, Hasan Çelebi b. Mehmed, Abdullah Çelebi b. Hüseyin.