Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 138 Hüküm no: 109 Orijinal metin no: [15a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Kara Mehmed’in Zenci kölesi Rahime bt. Abdullah’ı vefatından önce azat ettiği Mahrûse-i Galata hâricinde Müeyyedzâde mahallesinde sâkine iken bundan akdem müteveffiye olan Hadice bt. Kara Mehmed b. Abdullah nâm hâtunun verâseti zevc-i metrûku Mehmed Çelebi b. el-Hâc Abdülkādir’e ve kebîr oğlu İsmail Kapudan’a inhisârı tahakkukundan sonra müteveffât-ı mezbûre Hadice Hâtun rıkk-ı sâbıkını mu‘terife olan orta boylu açık kaşlı kara gözlü Zenciyyetü’l-asl Müslimetü’l-mille bâ‘isetü hâzihi’l-vesîka Rahime bt. Abdullah meclis-i şer‘de kendüye refîka olmak zu‘muyla bi’l-verâse vaz‘-ı yed eden mezbûr Mehmed Çelebi mahzarında üzerine da‘vâ ve tasvîr-i müdde‘â edip mevlâtiyem müteveffât-ı mezbûre Hadice Hâtun hâl-i hayâtında ve kemâl-i akl ve sıhhatinde fevtinden dört ay mukaddem beni mâlından tahrîr ve i‘tâk eyleyip hâlâ ben târih-i mezbûrdan beri hürre olmuş iken mezbûr Mehmed Çelebi bana rakīka olmak zu‘muyla vaz‘-ı yed eder suâl olunup kasr-ı yedine tenbîh ve sebîlim tahliye olunması murâdımdır dedikde gıbbe’s-suâl mezbûr Mehmed Çelebi cevâbında fi’l-vâki‘ mevsûfe-i merkūme Rahime’ye bi’l-verâse vaz‘-ı yedini ikrâr lâkin zevcesi müteveffât-ı mezbûre Hadice Hâtun’un mevsûfe-i merkūmeyi ber minvâl-i muharrer hayâtında mâlından tahrîr ve i‘tâk eylediğini inkâr edicek mevsûfe-i merkūme Rahime’den da‘vâ-yı mezkûresine muvâfık beyyine taleb olundukda müteveffât-ı mezbûrenin zâtını ma‘rifet-i şer‘iyye ile ârifân olan udûl-i ricâl-i Müslimînden ve mahalle-i mezbûre sâkinlerinden Ca‘fer Beşe b. Ali ve Hasan Beşe b. Mehmed nâm kimesne li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müteveffât-ı mezbûre Hadice Hâtun bt. Kara Mehmed b. Abdullah ber-vech-i muharrer hâl-i hayâtında ve kemâl-i akl ü sıhhatinde fevtinden dört ay mukaddem câriye-i memlûkesi olan işbu mevsûfe-i merkūme Rahime’yi bizim huzûrumuzda mâlından tahrîr ve i‘tâk eyledi binâen alâ-zâlik mevsûfe-i mezbûre Rahime târih-i mezbûrdan beri hürre olmuşdur biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle mevsûfe-i merkūme Rahime’nin hürriyetine ba‘de’l-hükm ve’t-tenbîh mâ-hüve’l-vâkı‘ bi’l-ibtigā ketb olundu. Fi’l-yevmi’t-tâsi‘ min-Şa‘bâni’l-mu‘azzam sene 1137. Şuhûdü’l-hâl: Halil Efendi b. Hüseyin, Arusi Mustafa Efendi, Mukayyid Molla İbrahim, Serbölük İbrahim Çelebi, Mustafa b. Receb, İsmail b. Osman.