Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 139 Hüküm no: 110 Orijinal metin no: [15a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Çelebi b. Ebubekir’in menzilini zevcesi Ümmühâni bt. Abdullah’a sattığı Mahrûse-i Galata muzâfâtından kasaba-i Kasımpaşa’da Câmi‘-i Kebîr mahallesinde sâkin Abdullah Çelebi b. Ebûbekir nâm kimesne meclis-i şer‘de zevcesi olup kasaba-i mezbûrede el-Hâc Hüsrev mahallesinde sâkine Ümmühâni bt. Abdullah b. Ahmed nâm hâtun tarafından ikrâr-ı âti’z-zikri tasdîka vekîli olduğu mezbûrenin zâtını ma‘rifet-i şer‘iyye ile ârifân İmâm es-Seyyid Yahya Efendi b. es-Seyyid Mustafa ve Müezzin el-Hâc Mehmed Efendi [b.] Hüseyin şehâdetleriyle sâbit olan işbu sâhibü’l-kitâb İbrahim Çelebi b. Ahmed nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik olup sâbıku’z-zikr Câmi‘-i Kebîr mahallesinde vâki‘ bir tarafdan Rahime Hâtun mülkü ve bir tarafdan Bakkal Hasan Beşe mülkü ve bir tarafdan Çadırcı İbrahim mülkü ve bir tarafdan tarîk-i hâs ile mahdûd fevkānî iki bâb oda ve bir sofa ve dehlîz ve tahtânî kenîf ve havlu ve bahçe duvarını ve müşterek bi’r-i mâ ve sokak kapısını müştemil mülk menzilimi bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık zevcem müvekkilem mezbûre Ümmühâni Hâtun’a tarafeynden îcâb ve kabûlü hâvî bey‘-i bâtt-ı sahîh-i şer‘î ile yüz seksen guruşa bey‘ u teslîm ol dahi ber-vech-i muharrer iştirâ ve tesellüm ve kabûl eyledikden sonra semeni olan meblağ-ı mezbûr seksen guruşu zevcem müvekkile-i mezbûre Ümmühâni Hâtun yedinden bi’t-tamâm ahz u kabz eyleyip menzil-i mezbûrun aynına ve semenine ve gabn ve tağrîrine müte‘allika âmme-i de‘âvî ve mutâlebât ve eymân ve muhâsamâtdan zevcem müvekkile-i mezbûre Ümmühâni Hâtun’un zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm menzil-i mahdûd-ı mezkûr bi-cemî‘i mâ yeştemilühû ve yahvîhi zevcem müvekkile-i mezbûre Ümmühâni Hâtun’un mülk-i müşterâsı olmuşdur keyfemâ teşâ ve tahtâr mutasarrıfa olun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâmin min-Şa‘bâni’l-mu‘azzam sene 1137. Şuhûdü’l-hâl: Osman Efendi b. Mehmed, Ömer Çelebi b. Abdullah, Molla Hasan b. Ali, Hasan b. Hüseyin, el-Hâc Osman b. Abdullah, Abdullah Çelebi b. Ahmed, Halil b. Mustafa.