Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 140 Hüküm no: 111 Orijinal metin no: [15a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Çelebi ile Fatıma bt. Abdullah’ın üç sehm dükkan hisselerini Fatıma bt. Ahmed Efendi’ye sattıkları Mahrûse-i Galata hısnı ebvâbından Tophanekapısı hâricinde vâki‘ bir tarafdan cidâr-ı hısn ve iki tarafdan Süleyman ve bir tarafdan tarîk-i âm ile mahdûd bir bâb dükkânın sekiz sehimden dört sehmi İbrahim Efendi veresesi ve bir sehmi Hadice Hânım ve bir sehmi Abdullah Çelebi b. İbrahim Efendi ve iki sehmi Fâtıma bt. Abdullah’ın ale’l-iştirâk mülkleri olduğu lede’ş-şer‘i’l-enver zâhir ve mukarrer oldukdan sonra mezbûr Abdullah Çelebi ile mezbûre Fâtıma Hâtun zâtı ba‘de’t-ta‘rîfi’ş-şer‘î meclis-i şer‘de mahrûse-i mezbûre a‘mâlinden kasaba-i Fındıklı’da İbrahim Efendi mahallesinde sâkine bâ‘isetü’l-vesîka diğer Fâtıma bt. Ahmed Efendi b. Ebûbekir Efendi nâm hâtunun oğlu ve tarafından ikrâr-ı âti’z-zikri tasdîke vekîli olduğu mezbûrenin zâtını ma‘rifet-i şer‘iyye ile ârifân İmâm Mustafa Efendi b. el-Hâc Ahmed ve Mehmed Çelebi b. Veli nâm kimesneler şehâdetleriyle sâbit olan es-Seyyid Mehmed Çelebi b. Abdullah nâm kimesne mahzarında her biri ikrâr ve takrîr-i kelâm edip dükkân-ı mahdûd-ı mezkûrda olan sekiz sehimden üç sehm-i şâyi‘amızı tarafeynden îcâb ve kabûlü hâvî bey‘-i bâtt-ı sahîh-i şer‘î ile müvekkile-i mezbûre diğer Fâtıma Hâtun’a doksan guruşa bey‘ u temlîk ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr doksan guruşu müvekkile-i mezbûre diğer Fâtıma Hâtun yedinden bi-kadri’l-hısas tamâmen ahz u kabz eyledik ba‘de’l-yevm dükkân-ı mahdûd-ı mezkûrda olan üç sehm hisse-i şâyi‘amız müvekkile-i mezbûre diğer Fâtıma Hâtun’un mülk-i müşterâsı olmuşdur keyfemâ teşâ ve tahtâr mutasarrıfa olsun dediklerinde vekîl-i mezbûr dahi mukırrân-ı mezbûrân Abdullah Çelebi ve Fâtıma Hâtun’u ikrâr-ı meşrûhalarında vicâhen tasdîk ve şifâhen tahkīk etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’l-hâdî aşer min-Şa‘bâni’l-mu‘azzam sene 1137. Şuhûdü’l-hâl: Mustafa Çelebi b. Mustafa. Ali b. Ahmed, İsmail Çelebi b. Mehmed, İbrahim Çelebi b. Halil, Mustafa Çelebi b. Hüseyin, İbrahim b. Mustafa, Katifeci İbrahim Çelebi, Mustafa Çelebi b. İbrahim.