Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 141 Hüküm no: 112 Orijinal metin no: [15a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. es-Seyyid Mustafa Odabaşı b. es-Seyyid Abdülkadir ile Şerife Fatıma bt. es-Seyyid Mehmed’in müşterek menzil davasında birbirlerinin zimmetlerini ibra ettikleri Husûs-ı âti’l-beyânın mahallinde keşf ve taksîm ve tahrîri iltimâs olunmağın savb-ı şer‘i’l-enverden mevlânâ Mustafa Efendi b. Hasan me’zûnen irsâl olunup ol dahi hâssa mi‘mârlardan Üstâd es-Seyyid Mustafa Halife b. Eyüb ve Mehmed Halife b. İsmail ile merhûm Piri Hoca nâm sâhibü’l-hayrın utekā ve evlâd ve evlâd-ı utekâsına meşrûta vakıf olup mahrûse-i Galata muzâfâtından kasaba-i Beşiktaş’da Sinan Paşa-yı Cedîd mahallesinde vâki‘ zikri âtî vakıf menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf-i nebevî eyledikde evlâd-ı utekādan es-Seyyid Mustafa Odabaşı b. es-Seyyid Abdülkādir nâm kimesne meclis-i ma‘kūd-ı mezbûrda li-ebeveyn [15b] er karındaşı kızı işbu râfi‘atü’l-vesîka Şerife Fâtıma bt. es-Seyyid Mehmed mahzarında mütevellî-i vakıf hâzır olduğu hâlde ikrâr ve takrîr-i kelâm edip vâkıf-ı mezbûrun ber-vech-i muharrer vakfı olup mi‘mârân-ı mezbûrân tahmîn ve takvîmleri üzere ebniye ve arsası altmış dört bin yüz otuz iki akçeye mukavvim işbu mu‘âyene olunan vakıf menzil kebîr ve vâsi‘ olmağla menzil-i mevkūf-ı mezbûru beynimizde bi’t-terâhî beynimizde iktisâm murâd eylediğimizde bir tarafdan Asiye Hâtun mülkü ve iki tarafdan mezbûre Şerife Fâtıma hissesine ta‘yîn olunan mahall ve bir tarafdan tarîk-i âm ile mahdûd ve mi‘mârân-ı mezbûrân mesâhalarıyla tûlen on dokuz ve arzan on buçuk bi-hesâb-ı terbî‘i yüz doksan dokuz buçuk zirâ‘ arsa üzerinde mebnî otuz iki bin yüz otuz beş akçeye mukavvim olan fevkānî iki bâb oda ve bir sofa ve dehlîz ve tahtında bir matbah ve ahur ve ardında vâki‘ terbî‘an yirmi dört zirâ‘ arsa-i sırfa benim nısf hisseme ta‘yîn ve tahsîs olunup ve iki tarafdan mezbûr Asiye Hâtun mülkü ve bir tarafdan Abbas Bey odaları ve bir tarafdan ba‘zen benim hisseme ta‘yîn ve tahsîs olunan mahall-i mezbûr ve ba‘zen tarîk-i âm ile mahdûd tûlen ve arzan bi-hesâb-ı terbî‘i iki yüz bir zirâ‘ arsa üzerine mebnî yirmi dört bin on akçeye mukavvim olan fevkānî üç bâb oda ve bir sofa ve dehlîz ve tahtânî iki bâb oda ve bir kilâr ve kenîf ile yedi bin iki yüz akçeye mukavvim olan bin iki yüz zirâ‘ bahçe arsası mezbûre Şerife Fâtıma’nın nısf hissesine ta‘yîn ve tahsîs ve bir birinden ifrâz ve beynlerine alâmet-i fâsıla vaz‘ ve her birimiz hisse-i mezkûrelerimizi ahz u kabz eylediğimizden sonra ben mukaddemâ menzil-i mevkūf-ı mezbûra mâlımdan harc ve sarf eylediğim iki yüz elli guruşa ve hâlen ta‘yîn olunan hisse-i müfreze-i mezkûrelerimize müte‘allika âmme-i da‘vâdan her birimiz âharın zimmetini ibrâ ve ıskāt eyledik dedikde gıbbe’t-tasdîki’ş-şer‘î vâki‘ hâli mevlânâ-yı mezkûr mahallinde ketb ü tahrîr ve ma‘an ba‘s olunan çukadâr Hasan Beşe b. Abdullah ve muhzır Süleyman b. Ahmed Çelebi ile mahfel-i şer‘a gelip alâ-vukū‘ihî inhâ ve takrîr etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’s-sâbi‘ min-Şa‘bâni’l-mu‘azzam sene 1137. Şuhûdü’l-hâl: Ahmed Efendi b. Mustafa el-imâm, Mustafa Halife b. İvaz el-müezzin, Ramazan Çavuş b. Hüseyin, Süleyman Çelebi b. Ahmed, Ali Haseki b. Ahmed, es-Seyyid Ali Ağa b. Hasan, İsmail Ağa b. Abdullah, Abdullah Çelebi b. Halil, Ahmed b. Mehmed, el-Hâc Abdi b. Eyüb, Ali Efendi b. İbrahim, Mehmed b. İsmail.