Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 142 Hüküm no: 113 Orijinal metin no: [15b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. es-Seyyid Mehmed’in evladları es-Seyyid Mehmed Emin, es-Seyyid Mehmed ve Şerife Emine’nin vakıf gelirlerini müşterek paylaşmaları gerektiği Merhûm es-Seyyid Mehmed nâm sâhibü’l-hayrın evlâdından es-Seyyid Mehmed Emin b. es-Seyyid Mustafa ve diğer es-Seyyid Mehmed b. es-Seyyid Esad nâm kismesneler ile Şerife Emine bt. es-Seyyid Ali nâm hâtun mahfil-i şer‘de vâkıf-ı mezbûrun evlâdından vakıf odaları ile zâviyesine berât-ı sultânî ve hüccet-i şer‘iyye ile mütevellî olup mahrûse-i Galata hâricinde Bedreddin Bey mahallesinde sâkin es-Seyyid el-Hâc Hüseyin b. es-Seyyid Mustafa b. es-Seyyid Hüseyin tarafından husûmet ve redd-i cevâba vekîl olduğu İbrahim Çelebi b. Mustafa ve Mustafa Çelebi b. Ahmed nâm kimesneler şehâdetleriyle sâbit olan işbu râfi‘u’l-kitâb Mustafa Çelebi b. Ahmed nâm kimesne mahzarında her biri üzerine tasvîr-i da‘vâ ve takrîr-i kelâm edip vâkıf-ı mezbûru gallesi evlâd-ı evlâd-ı evlâdına meşrûta vakıf olup mahrûse-i mezbûre hâricinde sâbıku’z-zikr Bedreddin Bey mahallesinde vâki‘ dört bâb odalarıyla Çürük yer ve Tonbaz yeri demekle ma‘rûf zâviye ta‘bîr olunur mekābir-i Müslimînden hâsıl olan gallât kadîmü’l-eyyâmdan bu âna gelince eben an-ceddin üç sehm i‘tibâr olunur bir sehmi es-Seyyid Ali tarafında evlâda ve bir sehmi es-Seyyid Esad Efendi tarafında olan evlâda ve bir sehmi mütevellî-i mezbûr el-Hâc Hüseyin tarafından olan evlâda verile gelip ve hâlen mütevellî-i mezbûr tarafından ancak mütevellî-i mezbûr el-Hâc Hüseyin ile sulbî oğlu es-Seyyid Ali’den gayri kimesne olmayıp ve bizim taraflarımızda evlâdı kesîr olmağla gallât-ı vâkıf evlâd beynlerinde ale’s-seviyye tevzî‘ ve taksîm olunmak üzere vekîl-i mezbûra tenbîh olunmak matlûbumdur dedikde gıbbe’s-suâl vekîl-i mezbûr cevâbında fi’l-vâki‘ gallât-ı vakıf kadîmden bu âna gelince müdde‘iyyûn-ı mezbûrûnun bâlâda takrîr ve tafsîl eyledikleri minvâl üzere eben an-ceddin üç sehm i‘tibârı üzere tevzî‘ ve taksîm olunageldiğini ikrâr eyleyip ve müdde‘yyûn-ı merkūmûnun takrîr-i meşrûhları üzere da‘vâları taksîm-i kadîme mugāyir olduğundan mâ‘adâ yedlerinde kat‘an sened-i şer‘iyyeleri dahi olmamağın mûcebiyle menâzil ve mekābirden kalîl ü kesîr hâsıl olan gallâtı kadîmîsi üzere beynlerinde islâsen tevzî‘ ve taksîm etmek üzere tarafeynden her birine tenbîh birle mâ hüve’l-vâki bi’l-ibtigā ketb olundu. Fi’l-yevmi’s-sânî min-Şa‘bâni’l-mu‘azzam sene 1137. Şuhûdü’l-hâl: Halil Çelebi Yorganî, Yorganî İbrahim Çelebi, Yorganî Mustafa Çelebi, Yahya Efendi b. Osman, Memiş Ağa b. Sefer, Haffâf el-Hâc Hüseyin, Uzun Mehmed kayık yapıcı, Nuh Bey kayık yapıcı, Burma Mustafa b. Mehmed, Mehmed b. Mustafa, İbrahim b. Muharrem.